Се проширува Пластичарската улица во Скопје
Ветување: Проширување на булеварот „Никола Карев“
[Извор: Изборна програма на Петре Шилегов– „Живот во Скопје за сите!“ стр.19 – датум, октомври 2017 г. ]
ОБРАЗЛОЖЕНИЕ:
Ветувањето на градоначалникот на Скопје, Петре Шилегов , за проширување на булеварот „Никола Карев“ (познат како Пластичарска улица), дадено во кампањата за локалните избори (октомври 2017 година), е во тек на реализација. Ова ветување на Шилегов е наведено во неговата изборната програма, „Живот во Скопје за сите!“, во рамките на проектот: „Нови сообраќајни решенија го решаваме градскиот метеж!“, стр.19, со која како кандидат на СДСМ ја бараше довербата за градоначалничката функција во главниот град.
Реконструкцијата на Пластичарката улица – која во иднина треба да има 4 сообраќајни ленти, велосипедска и пешачка патека и средишно зеленило, започна во декември минатата година (2019). Првата фаза од проширувањето на овој булевар се изведува на потегот од клучката кај Бит-пазар до влезот во касарната „Илинден“, на вкупна должина од 1.440 метри.
На овој дел ќе се изведе атмосферска канализација која досега не постоеше, а ќе се изврши и целосна реконструкција и на другите подземни инсталации за што се известени правните субјекти. Правилото е јасно – пет години по завршувањето на реконструкцијата на одредена сообраќајница нема да дозволуваме прекопување. Ова е прва фаза од реконструкцијата на оваа улица, во тек е проектирањето на втората фаза и очекувам напролет да ги продолжиме градежните работи од влезот во касарната „Илинден“ до спојувањето со булеварот Словенија – изјави тогаш градоначалникот Шилегов.
Според најавите од градските власти градежните работи од првата фаза на реконструкцијата на Пластичарска треба да се завршат до април 2020 година.
Информација и фотографии за стартот на проширувањето на овој булевар се објавени на официјалната веб-страница на Град Скопје и во повеќе медиуми.
Имајќи предвид дека се преземаат конкретни активности во правец на реализација на проектот и во изминатиот период на оваа прометна делница се прават градежни зафати (поради што има и времен сообраќаен режим), ова изборно ветување на Шилегов добива оценка „во тек“.
*** Забелешка
До крајот на мандатот на градоначалникот Шилегов – октомври 2021 година „Вистиномер“ повторно ќе се наврати на ова ветување за да ја провери исполнетоста.
Прширување на булеварот „Никола Карев“, инаку, ветуваше и претходниот градоначалник на Скопје, Коце Трајановски за локалните избори во 2013 година. Тогаш тој во неговата изборна програма „Нови дела за нов напредок, нови дела за подобро Скопје“ , (во делот Урбанизам, булевари, мостови, стр. 55), вети дека проширувањето на овој булевар ќе биде направено во периодот (2013-2015) година, но тоа не се случи. „Вистиномер“ во мај 2016 година го провери ова ветување и го оцени како неисполнето.
ИЗВОРИ:
· Изборна програма на Петре Шилегов- „Живот во Скопје за сите!“ стр.19 ( октомври 2017) [Проверено: 06.03.2020]
· Тајм.мк (13.12.2019): Започна проширувањето на Пластичарска [Проверено: 06.03.2020]
· Мета (13.12.2019): Почна реконструкцијата и проширувањето на Пластичарската улица во Скопје [Проверено: 06.03.2020]
· Веб-страница на Град Скопје : Од денеска се проширува и реконструира пластичарската улица [Проверено: 06.03.2020]
· Веб-страница наГрад Скопје (24.02.2020): Од утре времен сообраќаен режим на улица Пластичарска [Проверено: 06.03.2020]
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар