Со изборот на Џафери за собраниски спикер исполнето едно од главните ветувања на ДУИ
Ветување: Една од трите клучни политички функции во државата: Претседател, премиер или претседател на Собранието.
ОБРАЗЛОЖЕНИЕ:
Во политичкиот дискурс на ДУИ, речиси во секој изборен циклус, беше потенцирано ветувањето за избор на Албанец на една од клучните позиции во државата. Со изборот на Талат Џафери за претседател на Собранието на Македонија на 27.04.2017 година, ова ветување на ДУИ го сметаме за исполнето.
Ова ветување на ДУИ, беше споменато во 2011 година, кога беа побарани законски измени за начинот на избор на претседател на државата, со цел тој да се избира во Собранието. Споменатиот предлог доби најголема гласност за време на претседателските избори 2014, кoга беше промовирана идејата за избор на консензуален претседател и избор на Албанец за Претседател на државата, а откако тоа не се случи ДУИ не ги призна претседателските избори. Во тој контекст, лидерот на ДУИ, Али Ахмети, на 29.03.2014 изјави:
Албанците ќе заземат одговорност да владеат со државата, било тоа преку Претседателот, премиерот или Претседателот на Собранието, ова не треба да заплаши никого, туку да ги охрабри да не страдаат од комплексот дека ќе ни избега државата од рака.
Ова ветување на ДУИ беше спомененувано и во предизборната кампања за последните парламентарни избори кои произлегоа од големата политичка криза, но не премногу нагласено бидејќи ДУИ имаше и повнимателена реторика и помалку „бомбастични” изјави. Но, затоа идејата за избор на претседателот на Собранието од редовите на ДУИ, беше погласна после објавувањето на изборните резултати и при правењето на коалициски договор со сегашните владини партнери – СДСМ. Тогаш од ДУИ беше истакната идејата за избор на нивни кадар за претседател на Собранието, а за оваа функција уште веднаш беше посочен Талат Џафери. Со изборот на Џафери на челната позиција во парламентот се исполни и едно од главните долгогодишни ветувања на ДУИ.
Да потсетиме дека до неговиот избор дојде непосредно пред крвавите настани на 27.04.2017 година, а тој беше избран во една исклучително тензична и наелектризирана атмосфера во пленарната собраниска сала, а набрзо потоа се случи крвавиот инцидент во Собранието.
Неговиот избор како претседател на Собранието, беше поздравен од меѓународниот фактор, а по еден месец (31.05.2017) беше избрана и новата Влада предводена од СДСМ и ДУИ, со што и конечно се стави крај на долгата политичката криза во Република Македонија.
Имајќи ги предвид сите овие информации, ветувањето на ДУИ за „избор на Албанец, на една од трите најважни државни функции”, го оценуваме како исполнето.
ИЗВОРИ:
- Инсајдер (27.04.2017): Талат Џафери избран за Претседател на Собранието на Република Македонија [проверено на 19.06.2018]
- Алсат М(03.12.2016): ДУИ го заборави ветувањето за трите главни државни функсии [проверено на 19.06.2018]
- Аlbeu (30.06.2011): ДУИ бара Албанец за Претседател [проверено на 19.06.2018]
- Gazeta Dita (30.05.2016): Зоран Заев прифаќа еден од трите главни функсионери да биде Албанец [проверено на 19.06.2018]
- Novatv (27.04.2017): Мнозинството во Совранието го избра Талат Џафери за нов спикер [проверено на 19.06.2018]
- Gazeta Express (10.03.2014): ДУИ ќе се залага Претседателските избори да не успеат [проверено на 19.06.2018]
- Mkd.mk (27.04.2017): Еу го подрави изборот на Талат Џафери за Претседател на Собранието [проверено на 19.06.2018]
Оцени: Дрилон Салиу
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар