Со стара фотографија од ирански брод во пламен се илустрира потонувањето на крстосувачот Москва

Фотографијата којашто е искористена во постот за да се претстави потонувањето на крстосувачот Москва, е стара и неповрзана со руската инвазија на Украина. Таа потекнува од јуни 2021 година од потонувањето на иранскиот брод во Оманскиот залив

Рецензираме пост објавен на социјалната мрежа Фејсбук во кој се споделува медиумски напис  за тоа дека бил потопен крстосувачот Москва во Црното Море.

Веста е кратка и во неа се споделува информацијата дека потопен бил главниот брод на црноморската руска флота, крстосувачот Москва, откако бил погоден со две украински ракети во Црното Море, во близина на украинскиот брег, како дел од поморската блокада на УКраина од страна на руската морнарица. .

За да се илустрира медиумскиот напис, претставена е фотографија од брод којшто е запален, но таа фотографија воопшто не е поврзана со руската инвазија на Украина од 2022 година, туку е фотографија од јуни 2021 година кога иранскиот брод Харг потона, откако се запали во Оманскиот залив.

И покрај тоа што оваа фотографија нашироко се користи за да се портретира потонувањето на крстосувачот Москва, сепак, таа не е поврзана со него.

Фотографијата, како што пишува и сервисот за проверка на факти на „Ројтерс“, не е нова и ако се пребара на пребарувачот Гугл ќе се дојде до информацијата дека е објавена токму од „Ројтерс“, во јуни 2021 година со наслов: „Чад се крева од најголемиот брод на Иранската воена морнарица во пристаништето Јаск во Заливот на Оман, Иран, 2 јуни 2021 година”

Во тоа време фотографијата нашироко се споделуваше, а ја објавија голем број светски етаблирани медиуми, меѓу кои „Волстрит Џурнал“ и „Би Би Си“.

И пребарување на Твитер покажува дека фотографијата е споделувана на таа социјална мрежа во јуни 2021 година во постови кои известуваат за потонатиот ирански брод.

Рускиот брод Москва, потона минатиот четврток, според тоа што го објави руското министерство за одбрана. Украина тврди дека бил погоден, а Русија тврди дека се случила експлозија на муниција.

Поради сите горенаведени факти оценуваме дека фотографијата којашто е искористена за да се претстави потонувањето на крстосувачот Москва, е стара и неповрзана со руската инвазија на Украина, туку потекнува од 2021 година од потонувањето на иранскиот брод.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар