Сомнителна објава нуди лесна заработувачка преку неофицијална онлајн казино игра

Коцкањето и казино-апликациите честопати користат агресивен маркетинг, големи бонуси и „удвојување на депозит“.  Ако апликацијата не е достапна преку официјалните продавници (Google Play, App Store), инсталацијата преку APK или други канали може да претставува ризик: малициозен софтвер, кражба на лични или финансиски податоци, измамнички бонуси што тешко се исплаќаат

 

 

Анализираме објава на Фејсбук во која од наводно личен профил се споделува емотивна приказна за маж наводно вработен во Волт, на кого му се родил син со здравствени проблеми и за чијашто операција немал пари. Тогаш сретнал некој маж кој му кажал за некаква игра на онлајн казино преку која добивал голема сума пари и откако почнал да ја игра, неговите финансиски проблеми биле решени.

Непознат маж го спаси мојот син

Здраво на сите, јас сум Дамјан, живеам во градот Скопје.. Работам како курир во Wоlt. Работата, ако сме искрени, е далеку од лесна — постојана брзина, и речиси секој ден завршува со чувство дека веќе немаш ниту физичка, ниту морална сила, понекогаш изгледа како да живееш на автопилот

Пред неколку месеци нам со жена ми ни се роди син , Стево. Многу го очекувавме, но веднаш по породувањето докторите се загрижија. По испитувањата се потврди дијагноза: вроден стеноз на пулмонална артерија. Тоа е кога крвта од срцето кон белите дробови тешко оди, и без операција не може да преживее. Операцијата не е итна, но и не смее да се одложува за да нема компликации. Докторите кажаа такви суми, што едноставно останавме без зборови. А ние немаме ни заштеда, ни нечива помош – воопшто не беше јасно што да правиме.

И тогаш уште повеќе почнав да се изморувам од работата. Секој ден истото: нарачки, достава, гужви . Никаква радост, никакви перспективи, само умор и нерви, особено кога сфаќаш дека парите пак не се доволни.

Една вечер, кога врнеше силен дожд , се враќав дома по работа. На улица стоеше маж, мокар до коска, со крената рака. Застанав и му понудив да го повезам. Се покажа дека живее баш некаде блиску до мојата куќа.

По патот почнавме да разговараме. Томе, така се претстави патникот, ме праша каде работам. Му раскажав дека сум курир, и дека во целина сега е тежок период — проблеми со пари, син ми е болен, собираме за операција.

Малку замолкна, а потоа рече дека и тој неодамна бил во слична ситуација — исто така му се родило дете, и одеднаш трошоците пораснале. Рече дека пријател му предложил еден начин малку да се одвлече — апликацијата Игрална Палата. Тоа било онлајн-казино . Томе ми прати линк и спомена слот Gаtеs оf Olуmрus, вели, токму од тој слот ги имал првите добивки.

Тогаш бев скептичен. Но неговиот расказ не звучеше како реклама. Повеќе како обичен разговор на двајца уморни од живот луѓе, каде еден едноставно споделува што му помогнало барем малку да здивне.

Следниот ден, кога стоев во гужва, се сетив на вчерашното возење со Томе и решив да ја инсталирам апликацијата. Се регистрирав, внесов мал депозит – 630 македонски денари, кој се удвои, што многу ме израдува.

Почнав да играм на слот Gаtеs оf Olуmрus. На почеток не ми одеше, се разочарав, ја исклучив апликацијата. Вечерта по работа решив пак да играм, бидејќи на балансот останаа малку пари. И почна да ми се погодува, за разлика од претходно. Балансот ми беше веќе 2300 македонски денари. Бев среќен што не само што ги вратив потрошените пари, туку и заработив малку .

Така со недели, влегував во Игрална Палата и играв со мали суми.

Парите не ги вадев, ги држев на баланс и натрупав околу 60300 македонски денари.

Еден ден, за време на работа, возев со колата да доставам нова нарачка. Слушнав дека стигна некакво известување на телефонот . Го извадив телефонот, и гледам — известување од Игрална Палата, каде пишуваше дека денес има зголемена шанса за добивање бонус-левел.

Влегов на паркинг, и почнав да играм. По неколку минути, ми падна бонус-левел, играв уште неколку минути, и телефонот ми почна да „експлодира“. Веднаш ми се појави бројка од 587000 македонски денари . Седев во шок и веќе заборавив дека треба да носам нарачка кај клиент. Истата вечер парите веќе беа на мојата картичка. Првпат по долго време бев навистина среќен.

Со добиените пари ја платив операцијата на син ми, и сега е здрав , што за нас со жена ми е најважно.

Сега и понатаму играм казино кога имам слободно време, и оставам пари на баланс, за повторно во еден момент да добијам голема сума.

Пак се уверувам колку судбината е интересна работа: случајна средба со непознат маж му помогна на мојот син.

Можеби и овој пост, што случајно ти се појави во лентата и што го читаш сега, ќе ти помогне со твојот проблем, — затоа подолу оставам линк до апликацијата, стои во објавата

На профилот од кој е споделено објавата има само неколку фотографии од машки лик наводно со неговата сопруга и бебе, и сите се споделени на 22 август. Профилот има само 19 следбеници.

Кога ќе стиснете на линкот што го нуди објавата, тој ве води до страница за инсталирање на игра која се вика „Игрална палата“.

Во коментарите под апликацијата, неколку луѓе раскажуваат како добиле наводно доста високи бонуси и заработиле многу пари.

Станува збор за онлајн казино/слот апликација која нуди бонуси за депозити и е наменета за возрасни (18+).

Ваквите апликации се дизајнирани да ве мотивираат да вложувате пари. Може да бидат забавни, но и ризични поради можноста за развој на зависност од коцкање. Често користат агресивни маркетинг стратегии (големи бонуси, „бесплатни“ вртења).

Ја побаравме играта во Google Play (соодветната општа страница за апликации и игри), но не најдовме резултат за апликација со име „Игрална Палата“ (на кирилица или латиница). Се чини дека ваква игра во моментов официјално не постои на Google Play. Ако се работи за App Store (iOS), не го најдовме ниту таму само врз основа на општите категории и пребарувања.

Тоа може да значи дека апликацијата не е објавена официјално. Таа може да постои само во одредена земја или регион, и затоа да не е видлива преку глобално пребарување.  Или, пак, станува збор за апликација од трета страна, достапна само преку надворешна („side-load“) инсталација, што носи ризици – особено кај казино/коцкарски апликации.

Доколку ја видите оваа апликација преку некаков веб-сајт или реклама, би било добро да ги проверите следните детали: Кој ја нуди апликацијата? (име на компанија или развивач, линк кон Play/App Store). Дали има официјален веб-сајт, контакти или информации за лиценца/регулација?

Коцкањето и казино-апликациите честопати користат агресивен маркетинг, големи бонуси и „удвојување на депозит“.  Ако апликацијата не е достапна преку официјалните продавници (Google Play, App Store), инсталацијата преку APK или други канали може да претставува ризик: малициозен софтвер, кражба на лични или финансиски податоци, измамнички бонуси што тешко се исплаќаат.

Од сето погоре можеме да заклучиме дека во моментот нема официјална верзија на „Игрална Палата“ во Google Play (и нема докази за App Store). Таа најверојатно не е регистрирана или достапна преку официјалните канали, што само по себе е сигнал дека треба да се внимава.

Вистиномер и претходно има пишувано за вакви онлајн игри кои функционираат врз основа на пирамидални шеми, а кои се измамнички.

Поради тоа, објавата која ја анализираме, ја оценуваме за невистинита.

 

 

 

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар