Сорос не е на листата донатори на „Фридом Хаус“
На листата поддржувачи објавена на сајтот на „Фридом Хаус“, не се посочени Џорџ Сорос и Фондацијата „Отворено општество“. На списокот на поединци, фондации, компании и влади, кои имале донации и грантови во износ од 100.000 долари и повеќе, сметајќи од 1 јули 2015 година досега, го нема ниту Сорос , ниту неговата Фондација
Новоименуваниот амбасадор на Република Македонија во Мисијата на ЕУ во Брисел, поранешниот пратеник од ВМРО-ДПМНЕ, Александар Николоски, во емисијата „Топ тема на ваша страна“ на телевизија „Телма“ (05.04.2017), меѓу другото, изјави:
Факт е дека Организацијата „Фридом Хаус“ е директно финансирана, како главен и основен финансиер токму од Џорџ Сорос, така што необјективно е да ја коментираме…
Но, секако сме спремни да дискутираме за било кое прашање кое што е дел од извештајот: можеме да дискутираме за состојба во демократијата, медиуми, итн. но, извештајот не би можел да го прифатам како релевантна точка за којашто треба да се зборува.
[Извор: YouTube , (54,40 до 55,12 минута од видеото) датум: 05.04.2017]
ОБРАЗЛОЖЕНИЕ:
Оваа изјава на новиот шеф на македонската мисија при Европската унија во Брисел, експратеникот од ВМРО-ДПМНЕ, Александар Николоски, во која вели дека американската невладина организација „Фридом Хаус“ е финансирана од Џорџ Сорос, е невистинита. Сорос не е меѓу донаторите наведени на веб-страницата на „Фридом Хаус“.
Ваквото паушално тврдење, инаку, Николоски го изнесе одговарајќи на прашањето на новинарката поврзано со последниот Извештај на „Фридом Хаус“ за „Нации во транзиција“, а во кој за Македонија се забележува натамошен пад на демократијата и има најголемо назадување од балканските држави. Според овој Извештај , Македонија во 2016 година е на најниско демократско ниво од 2001 година кога земјата се соочи со насилен етнички конфликт.
Во споменатиот Извештај на „Фридом Хаус“, Македонија е сместена во групата земји со транзициски-хибриден режим на граница кон автократија.
Генералниот индекс на демократијата во земјава, кој е збир на седум специјални индекси за минатата година изнесува 4,43, на листа од 1 до 7, каде 1 означува највисоко ниво на демократски прогрес, а 7 означува најниско ниво. Тој индекс паѓа 10 години по ред, па од 3,86 за 2007 година стасал до 4,29 за 2015 година, а изминатата година паднал дополнително.
Доколку во наредниот период земјата ја „достигне“ оценката 5, веќе ќе влезе во групата авторитарни режими заедно со Киргистан, Белорусија, Русија, Азербејџан и други поранешни советски републики.
По одделни ставки, Македонија веќе се смета за авторитарен режим во однос на демократското владеење на национално ниво (оценка 5) и слободата на медиумите (5.25), а многу блиску до таков статус е и во однос на независноста на судството и корупцијата – за кои заедничката оценка е 4.75.
Но, ВМРО-ДПМНЕ го смета за нерелевантен извештајот на „Фридом Хаус“. Според партијата, тој наводно не е одраз на фактичката ситуација во земјата, туку се потпира на лажни и нарачани извештаи од Сорос. А, истиот став го соопшти и Николоски во емисијата „Топ тема на ваша страна“, каде во два наврати кажа:
Не можам да се согласам дека ВМРО-ДПМНЕ или Владата која беше досега, довела до она што е наведено во извештајот. Факт е дека извештајот е крајно необјективен, факт е дека извешатојот има одредени цели коишто треба да ги оствари и затоа е таков напишан. ВМРО-ДПМНЕ без разлика дали е во власт или во опозиција во овие 25 години постоење на партијата секогаш имала проблем со невладините организации и Фондацијата овде во Македонија финанисрани од Џорџ Сорос… (53,55 до 54, 40 минута од видеото)
Меѓутоа, на листата поддржувачи објавена на сајтот на „Фридом Хаус“, не се посочени Џорџ Сорос и Фондацијата „Отворено општество“. На списокот на поединци, фондации, компании и влади, кои имале донации и грантови во износ од 100.000 долари и повеќе, сметајќи од 1 јули 2015 година досега, го нема ниту Сорос , ниту неговата Фондација.
„Фридом Хаус“ е американска невладина организација (НВО), основана уште во октомври 1941 година и нејзиниот фокус се почитувањето на демократијата, политичките слободи и човековите права. Почнувајќи од 1972 година Фридом Хаус објавува годишни извештаи (од 1978 во форма на книга) за степенот на граѓанските демократски слободи и права во земјите ширум светот, притоа оценувајќи ги на скала од 1 (највисоко) до 7 (најниско ).
Сепак, не е првпат сѐ уште владејачката ВМРО-ДПМНЕ да ги критикува извешатиите на „Фридом Хаус“ и да излегува со невистинито тврдење дека е финансирана од Сорос. Такви се нејзините реакции после секој Изветшај на оваа организација во последните години.
ИЗВОРИ:
- YouTube (05.04.2017): Топ Тема На Ваша Страна (05.04.2017)(54,40 до 55,12 минута од видеото) [Пристапено на 07.04.2017]
- Тајм.мк (16.11.2016): Николоски на амбасадорската функција во во мисијата на ЕУ во Брисел стапува по изборите [Пристапено на 07.04.2017]
- Тајм.мк (04.04.2017): Извештај на Фридом хаус: Влошена оценката за демократското владеење во Македонија [Пристапено на 07.04.2017]
- Мета (04.04.2017): „Фридом хаус“: Демократијата во Македонија на најниско ниво на Балканот [Пристапено на 07.04.2017]
- Дојче Веле (04.04.2017): Фридом Хаус: Македонија на чекор до авторитарен режим [Пристапено на 07.04.2017]
- Freedom House: [Пристапено на 07.04.2017]
- Wikipedia: Freedom House [Пристапено на 06.04.2017]
- Нова ТВ (13.06.2014): ВМРО ДПМНЕ:Фридом Хаус е финансирана од СОРОС, затоа прави вакви извештаи [Пристапено на 06.04.2017]
- Точка ( 12.04.2016): ВМРО-ДПМНЕ: Фридом Хаус е финансирана од СОРОС [Пристапено на 06.04.2017]
Оцени: Оливера Војновска
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар