Споро се гради пругата Куманово-Бељаковце

Од Оливера Војновска 0
Изградбата на оваа делница почна во март 2014 година Фото: Принтскрин

 

ИЗГРАДБА И РЕКОНСТРУКЦИЈА НА ПРУГАТА НА ДЕЛНИЦАТА КУМАНОВО-БЕЉАКОВЦИ

Проектот предвидува изградба и реконструкција на пруга во должина од 30,8 км преку подобрување на техничките карактеристики на пругата, замена на старите и дотраени прагови со замена на нови прагови и замена на шините, положување на нов толчаник, поправање на темелните стопи и лежиштата, обновување на изолацијата и дренажата, изградба на нов мост на реката Пчиња, обновување на постојните мостови, инсталирање на кабелски водови и огради, поставување безбедносни бариери и заштита од бука и вибрации, поставување на нови сигнално – сигурносни уреди ETCS ниво 1, изградба на три железнички станици Куманово Ново, Шупљи Камен и Беља- ковце како и 6 стојалишта во Лопате, Перо Чичо, Проевце, Доброшане, Клечовце и Довезанце, како и изградба на нови надвозници и подвозници. Средствата за реализација на проектот се обезбедени од ЕБОР.(Буџет: 39.800.000 евра за градежни работи Рок: 2014-2016 Година)

 

ОБРАЗЛОЖЕНИЕ:

Проектот „Изградба и реконструкција на пругата Куманово-Бељаковце“, е ветен во изборната програма  на ВМРО-ДПМНЕ, „Проверено“ (2014-2018) во делот„Инфраструктура“ (Железнички сообраќај и инфраструктура  стр.67), со рок на спроведување 2016 година и неговата реализација е во тек. Но, изградбата на оваа пруга оди бавно и тешко дека целата делница ќе може да биде готова во наредните два месеца, кога истекува крајниот термин за нејзиното  завршување.

Во март 2014 година почна реализацијата на овој проект и тогаш беше соопштено дека градежните работи ѝ  се доверени на германската компанија „Вибе“, дека ревитализацијата на оваа делница ќе чини  46 милиони евра (обезбедни од Европската банка за обнова и развој), како и тоа дека пругата треба да биде готова за три години.

Во октомври 2015 година Билд пренесе информација од терен дека:

Процентот на реализација на работите е на минимално ниво, иако крајниот рок за целосно завршување на делницата од Куманово до Бељаковце е 2016 година. Градежните работи на терен доцнат во секој поглед. Постоечките надвозници во Куманово не се реконструирани, додека единствената завршена работа е отстранувањето на претходната неупотреблива пруга. Во моментов (октомви 2015 година н.з.) на терен во кумановскиот регион се работи на ридските засеци долж трасата, како и кај селото Лопате на изградба на еден од планираните мостови.

На трети септември оваа година (2016) СДСМ на прес-конференција ја критикуваше владејачката паретија дека

Иако помпезно се најавуваше, за 10 години не се изгради ниту пругата кон Бугарија. Почната е само првата од трите делници, од Куманово до Бељаковце и се реализирани само 5 отсто од работите. (Благој Бочварски, претседател на Комисијата за транспорт и врски во СДСМ)

Истиот ден (03.09.2016) имаше реакција и ВМРО-ДПМНЕ во која е наведено дека е „во тек изградбата на пругата Куманово-Бељаковце во должина од 30,8 км“, но  во соопштението нема  ништо за тоа до каде се работите.

На 21 септември 2016 година медиумите пренесоа изјава на министерот за транспорт и врски Владо Мисајловски, во која тој фактички ја повтори информацијата:

Во тек е изградба на пругата кон Република Бугарија и тоа на потегот од Куманово до Бељаковце, инвестиција од 40 милиони евра…

Но, и Мисајловски не кажува конкретно колку и што е сработено на оваа делница.

На 15.10.2016 година  во текстот со наслов: „Железницата веќе не е ниту на слеп колосек!“ на   Дојче веле, пренесена е оваа изјава од Благоја Бочварски:

Пругата кон Бугарија е реализирана едвај 5%, односно само 20% од првата делница од Куманово кон Бељаковце која требаше да биде готова во септември. Средствата се обезбедени од ЕБОР, договорот е истечен и сега е потребно дополнително да се ангажира консултант бидејќи и на тој му истече договорот, дополнителен надзорен орган, што се нови трошоци. Секое пролонгирање бара дополнителни средства кои државата ги нема. Тоа доведува до опасност ЕБОР да ги повлече парите, а од друга страна втората делница воопшто не е ниту почната да се гради, туку напротив таму имаме забавена динамика со проектирањето, се доцни со проектот а рокот за избор на фирма која треба да гради истече лани во септември. (Бочварски) 

Во врска со овој проект во истиот напис има и реакција од Министерство за транспорт и врски, од каде ја повторуваат истата информација дека е „во тек изградба на пругата од Куманово до Бељаковце, инвестиција од 41 милион евра… “. Меѓутоа и во неа нема одговор на критиките од опозицијата дека „проектот доцни и дека се направени само само  20%  делница од Куманово кон Бељаковце.“

Ова ветување се споменува во Отчетот за реализација на програмата на ВМРО-ДПМНЕ и коалицијата „За подобра Македонија” (стр.87), како еден од проектите чија реализација е во тек.

Имајќи го предвид сето ова, како и фактот што сѐ уште не е истечен  рокот наведен во програмата (2016), според методологијата на Вистиномер ова ветување има оценка „во тек“.

 

ИЗВОРИ:

 

 

Оценето од: Оливера Војновска

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Овој напис е изработен во рамките на Проектот за зголемување на отчетноста и одговорноста на политичарите и партиите пред граѓаните, Вистиномер, имплементиран од Метаморфозис. Написот e овозможен со поддршка на американската непрофитна фондација (NED - National Endowment for Democracy) и Балканскиот фонд за демократија, проект на Германскиот Маршалов фонд на САД (BTD – The Balkan Trust for Democracy, a project of the German Marshall Fund of the United States), иницијатива која поддржува демократија, добро владеење и евро-атлантски интеграции во Југо-источна Европа. Содржината на рецензијата е одговорност на авторот и не ги одразува ставовите на Метаморфозис, National Endowment for Democracy, The Balkan Trust for Democracy, проект на Германскиот Маршалов фонд на САД, или нивните партнери.
Слични артикли

Оставете реакција

Јазици MK SQ EN