Стара снимка за ново заплашување од рускиот одговор на операцијата „Пајажина“

Од Екипа на Вистиномер On Jun 3, 2025 0

Фото: Принтскрин видео ФБ

Не е точно дека на видеоматеријалот кој е поставен во објавата што ја рецензираме „се гледа првиот напад на украински цели со ракети „Искендер“ после нападот на Украина врз руските воени бомбардери“. Како што пишуваат проверувачите на факти на „Дојче Веле“, откако Украина изврши операција во која таргетираше цели длабоко во Русија во неделата на 1 јуни, на социјалните мрежи се појавија снимки што наводно го прикажуваат „рускиот одговор“, но станува збор за стари снимки, а таква е и таа од оваа објава

Не е точно дека на видеоматеријалот, кој е поставен во објавата што ја рецензираме, „се гледа првиот напад на украински цели со ракети „Искендер“ после нападот на Украина врз руските воени бомбардери“. Како што пишуваат проверувачите на факти на „Дојче Веле“, откако Украина изврши операција во која таргетираше цели длабоко во Русија во неделата на 1 јуни, на социјалните мрежи се појавија снимки што наводно го прикажуваат „рускиот одговор“, но станува збор за стари снимки, а таква е и таа од оваа објава

Рецензираме објава на социјалната мрежа Фејсбук во која се споделува видеоматеријал и пишува:

Опасно ескалира војната меѓу Русија и Украина. Денес најновиот напад со беспилотни летала на Украина врз руски воени авиони и воздухопловни бази бил снимен на камера. Уништени се 40 руски воени авиони и неколку воздухопловни бази.

Украина удри тапани за сопствениот крај.

Руските нуклеарни сили сега се во целосна готовност, чекале само наредба за лансирање.

Рускиот одговор ќе ја означи судбината на светот.

На снимката се гледа првиот напад на украински цели со ракети искандер.

Долга и ужасна ноќ за Украина.

Не е точно дека на видеоматеријалот кој е поставен во објавата што ја рецензираме „се гледа првиот напад на украински цели со ракети „Искендер“ после нападот на Украина врз руските воени бомбардери“. Како што пишуваат проверувачите на факти на „Дојче Веле“, откако Украина изврши операција „Пајажина“ (Spiderweb) во која таргетираше цели длабоко во Русија во неделата на 1 јуни, на социјалните мрежи се појавија снимки што наводно го прикажуваат „рускиот одговор“, но станува збор за стари снимки, а таква е и таа од објавата што ја рецензираме.

Видеото навистина покажува напад од Русија кон Украина, ама снимката е стара и датира од јули 2024 година кога Русија почна масовен напад врз детска болница во Киев.

Точно е дека на 1 јуни 2025 година Украина изврши успешна операција во која таргетираше цели длабоко во Русија. Украина соопшти дека над 40 бомбардери, или околу една третина од руската флота на стратешки бомбардери, биле оштетени или уништени во неделата, иако Москва соопшти дека биле погодени само неколку авиони. Спротивставените тврдења не можеа да бидат независно потврдени, а видеото од нападот објавено на социјалните мрежи покажува дека само неколку бомбардери се погодени.

Меѓутоа, и покрај тоа што во објавата пишува дека „руските нуклеарни сили сега се во целосна готовност и чекаат наредба за лансирање“, оваа информација не е базирана на ничија изјава, најава, туку на претпоставка без докази. Во анализата на „Атлантик Каунсел“ се наведува дека повеќето набљудувачи очекуваат некаков одговор од Кремљ на украинската операција, а „некои растроени воени блогери повикуваат на употреба на тактичко нуклеарно оружје“, сепак поверојатно е дека Москва ќе одговори по сегашните оперативни линии, со спроведување уште помасовни воздушни напади.

Кога станува збор за пресметките на Путин во оваа војна, нуклеарното оружје е првенствено реторичка алатка за заплашување на западните лидери од поцврста поддршка на Украина, се наведува во анализата

Во анализата на „Ал Џезира“ пак се наведува дека украинската операција го ослабува имиџот на Русија. Стратешките бомбардери се користеа за лансирање балистички и крстосувачки ракети од рускиот воздушен простор за да се погодат цели низ Украина, предизвикувајќи големи штети и цивилни жртви.

Нападот ненамерно „му помогна на Западот, бидејќи беше насочен кон [рускиот] нуклеарен потенцијал, изјави за Ал Џезира генерал-потполковник Ихор Романенко, поранешен заменик-началник на Генералштабот на украинската војска.

Николај Митрохин, истражувач на германскиот универзитет во Бремен за „Ал Џезира“ изјави дека:

Уништувањето на руската стратешка авијација не е затоа што таа е способна да носи ракети со нуклеарни боеви глави, туку поради нејзината употреба за лансирање ненуклеарни ракети.

Инаку, и според „NBC News“ постојат проруски блогери кои повикуваат на „нуклеарен одговор“ од страна на Русија, но таков досега ниту е најавен од официјални или армиски лица на Кремљ.

И проверувачите на факти на „Дојче Веле“ пишуваат дека најавите оти Русија „ги ставила нуклеарните сили во целосна готовност“, се недокажани.

Поради сите горенаведени факти објавата што ја рецензираме ја оценуваме како делумна невистина.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар