Субјективно и емоционално коментирање во новинарски прилог (дополнето со реакција)
(реакцијата можете да ја најдете веднаш под под самата рецензија)
Пишува: Билјана Т. Димко
На веб страницата на телевизија „Алфа“ на 27.06.2020 беше објавен прилог: Прогонот врз Душко – млекарот кулминира со семејна драма https://alfa.mk/progonot-vrz-dushko-mlekarot-kulminira-so-semejna-drama/.
Предмет на оваа рецензија е необјективното коментаторско драматично однесување на новинарот на прилогот.
Подолу е цитирана клучната информација од овој прилог, и не содржи ништо драматично и семејно.
Битолчанецот Душко Млекарот, кој неколку години преку социјалните мрежи објавуваше материјали за незаконското работење на актуелната власт и кој, поради закани од поединци, како што велеше, бил принуден со семејството да побара азил во Германија, сега таму веќе е во екстрадициски притвор. Ова е последица на распишаната потерница од Основниот суд во Битола во март годинава, а поради две правосилни пресуди како учесник во “Шарената револуција“- едната од една година за учество во толпа, а другата од една и пол година, за наводен напад врз службено лице. Го осудија без да има можност да се брани и како што ни рече пред неколку месеци – „претходните само ме гонеа, ама овие ме осудија“.
Подоцна во прилогот новинарот емоционално коментира:
Неверување, страв и тага владее на улица “Коста Абрашевиќ“ бр. 39 во Битола. Родителите на Душко Млекарот, силно потресени и со голема тага го очекуваат исходот од она што ќе се случува во Германија со екстрадицискиот притвор.
Мајката Лиле и таткотоТоме нè пречекаа видно вознемирени, истрошени и столчени од моќната тупаница на власта, во која Дуле Млекарот со години се колнеше, а на крај, само зашто јавно ги критикуваше, му се намерачија да го донесат во македонските затвори.
Во прилогот, родителите на Илиевски се потресени поради новонастанатата ситуација. Мајката на Илиевски вели дека Илиевски е во притвор поради СДСМ, но ни таткото ни мајката не кажуваат дека директно врз нив е направен напад од „моќната тупаница на власта“, освен ако авторот сакал метафорично да ја пренесе загриженоста на родителите. Но, истовремено требало и да ја информира јавноста и со официјални информации од соодветните државни органи за екстрадицискиот притвор на Илиевски.
Според сајтот СДК: „Во решението на Основниот суд од Битола стои дека тие го прифатиле предлогот на Основното јавно обвинителство на Илиевски да му се суди во отсуство бидејќи тој не е во земјата, а постоеле важни причини да му се суди.“
Исто така Душко Илиевски Млекарот знаел дека ќе му се суди во отсуство, така што новинарот не морал толку емпатиски и субјективно да коментира.
Редакцијата на Вистиномер доби реакција на оваа рецензиија од авторот на прилогот што е рецензиран на оваа страна. Реакцијата е објавена во целост:
Почитувана, ако ја сакавте до крај вистината, можевте да го видите и мојот прилог од трети март, а тоа што го коментирате е само продолжение на истиот. Таму ги објаснив правните аспекти на екстрадицијата и бев единствениот новинар што се сретна со претседателот на Основниот суд во Битола. За емотивниот набој, ние сме единствената редакција што остваривме средба со ова семејство во Германија и два пати бевме кај родителите. Па, искрено, таму и во тие средби имаше многу емоции! За емпатијата! Цицерон пред два века рекол sumum ius, summa injuria/ и најголемата правда може да биде голема неправда/ Во овој случај, за исто дело тандемот Душко и тутунарот Кире Неделковски беа судени со башка аршини- Душко осуден со ефективна затворска казна, Кире условно. Зошто? Индикативно е што потоа, Заев го постави за претседател на Сојузот НС тутунарите и, галиба, проневери куп пари. Го сменаа и влакно не му фали. Неговиот ортак Душко започна против нив јави да напаѓа и ете стаса дотука како ,, дете кое ќе го проголта Шарената револуција” . Емотивниот сегмент во оваа сага е незаменлив како што јас го работев- репортерски! А коментар / оцена/ нема. На крај, млада дамо, дали е објективно или селективно тоа што го работите, бе знам! Крстот вие ќе си го носите, а јас 42 години опстојат во оваа професија. Примето поздрав од колега со илјадници репортажи и ТВ- прилози! Петар Стефановски
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
