Свети Валентин не бил војник и Денот на вљубените не започнал да се слави во американската армија

Свети Валентин е историско име поврзано со маченик од III век. Легендите за брак и „воени љубови“ се повеќе мит отколку потврден факт. Денот на вљубените се прославува како романтична традиција уште од средниот век и не е создаден како официјален празник од американската армија во 1976 година

 

Анализираме објава на Фејсбук која вели:

Валентин бил војник на Римското Царство, кој се заљубил во друг војник и тајно се ОМАЖИЛЕ. И покрај забраната на царот Клавдиј.

Слушајќи го ова, царот Клавдиј наредил погубување на Валентин.

Подоцна, Католичката црква и папата Фредерик го прогласиле за светец.

Оттука и името Свети Валентин, а самиот празник почнал да се слави во 1976 година во дваесеттиот век во американската армија како ДЕН НА ВЉУБЕНИТЕ“.

Ете каков празник слават и одбележуваат СЕЉАЧААНАТА, НЕЗНАЛИЦИТЕ и ПОМОДАРЦИТЕ.

Тврдењето изнесено во објавата дека Валентин бил римски војник, вљубен во друг војник со кого тајно се омажил, бил убиен по наредба на царот Клавдиј, а Денот на вљубените почнал да се слави како празник во американската армија во 1976 година, не е потврдено со историски извори и содржи погрешни или погрешно интерпретирани делови.

Еве што велат фактите.

Историјата потврдува дека Свети Валентин е име на ранoхристијански маченик од III век во рамките на Рим и Римското Царство. Некои записи го опишуваат како свештеник или бискуп кој бил погубен заради христијанската вера околу 270 година.

Но, нема историски податоци дека тој бил војник. Историските записи го опишуваат како свештеник или бискуп, не како борец во војска.

Следствено на тоа, нема никакви историски сведоштва дека тој се вљубил во друг војник или дека самиот стапил во брак со друг маж.

Една широко распространета легенда вели дека царот Клавдиј II Готски забранил младите војници да се женат за да бидат подобри борци и Валентин тајно венчавал парови. Оваа приказна се појавува во средновековни извори како легенда, но не постојат римски документи што ја потврдуваат забраната ниту дека Валентин всушност го направил тоа.

Историјата не потврдува дека царот им дал таква наредба.

Значи, идејата за забрана и тајни бракови може да биде романтизирана легенда, а не проверена историска состојба.

Тврдењето дека празникот почнал да се слави во 1976 година во американската војска не е точно. Историските записи покажуваат дека денот на Свети Валентин се поврзува со романтична љубов барем од 14 век, кога поетот Џефри Чосер (Geoffrey Chaucer) го спомнал во својот труд како денот кога „сите птици си ги бараат своите партнери“.

Тој празник бил широко распространет низ Европа и потоа во САД уште во 18-19 век, многу пред 1976 година. Во САД, масовно испраќање „валентинки“ и честа комерцијална употреба започнала уште во 1.800‑тите.

Значи, Денот на вљубените не е создаден од американската армија, ниту во 1976 година, туку развојот на празникот е многу постар и постепен.

Католичката Црква навистина го признава Свети Валентин како светец и маченик, но неговиот спомен на 14 февруари бил истакнат уште во антички и средновековни календари.

Во 1969 година, поради ограничени историски податоци, името на св. Валентин било отстрането од главниот Католички календар, но сепак се почитува во некои локални литургии.

Од сето ова можеме да заклучиме дека Свети Валентин е историско име поврзано со маченик од III век. Легендите за брак и „воени љубови“ се повеќе мит отколку потврден факт. Денот на вљубените се прославува како романтична традиција уште од средниот век, и не е создаден како официјален празник од американската армија во 1976 година.

Поради тоа објавата што ја анализираме ја оценуваме како невистина.

 

 

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар