„Техномаркет“ не дели лаптопи за 120 денари, не наседнувајте на лажната наградна игра

Од Екипа на Вистиномер On Jul 21, 2025 0

Граѓаните не треба да оставаат свои лични и банкарски податоци на страници коишто ветуваат работи коишто се предобри за да бидат вистинити. Вистинската цена на лаптоп компјутерите е повисока од 120 денари независно од тоа каква им е состојбата и независно од тоа дали доаѓаат со или без гаранција, дури и кога се купени на старо

Граѓаните не треба да оставаат свои лични и банкарски податоци на страници коишто ветуваат работи коишто се предобри за да бидат вистинити. Вистинската цена на лаптоп компјутерите е повисока од 120 денари независно од тоа каква им е состојбата и независно од тоа дали доаѓаат со или без гаранција, дури и кога се купени на старо

Рецензираме објава на социјалната мрежа Фејсбук во која пишува:

Technomarket дели HP лаптопи на сите семејства во Босна со попуст од -99%!

На еден од европските магацини на HP се случила сериозна техничка грешка при пакување на нова пратка лаптопи.

Пратката пристигнала во Босна како редовна испорака за Technomarket, но по проверката се утврдило дека ниту еден уред нема сертифицирана гаранција. Сите уреди се целосно исправни, нови, во фабрички пакувања – но без гаранциски листови кои требало да ги приложи производителот.

Поради оваа грешка, лаптопите не можат да се продаваат по полна цена преку официјални продавници.

Кликни на копчето подолу за да го добиеш твојот HP лаптоп.

Во склоп на објавата се споделува надворешен линк кој води до страница на којашто од корисниците се бара да одговорат на прашањата дали се маж или жена, колку години имаат, колку членови има нивното семејство и дали претходно купувале од „Техномаркет“.

Откако ќе одговорат со „да“ или „не“ на поставените прашања и ќе ги одговорат прашањата, тие автоматски се пренасочени во креирана страница којашто не кореспондира со реалноста и во која е целосно злоупотребено логото и брендот на „Техномаркет“.

Како последен чекор во овој измамнички маркетинг со невистинита содржина, се бара од корисниците на социјалните мрежи да остават број на својата банкарска картичка и лажно им се претставува дека ќе им бидат наплатени 120 денари, кога всушност со пополнувањето на полињата, тие стануваат жртви на интернет-измамници.

Граѓаните не треба да ги пополнуваат своите лични и банкарски податоци во полињата, бидејќи на таков начин ќе им дадат пристап на измамниците до нивните банкарски податоци. Самата наградна игра не постои, не е веродостојна туку станува збор за злоупотреба на брендот на „Техномаркет“ со неточни податоци. Во објавата невистинито се тврди дека „лаптопите станале достапни за давање зашто немале банкарски листови со нив“ што е самото по себе измислица.

Исто така, самата страница од која се споделува лажната наградна игра, не е официјалната страница на „Техномаркет“. Лажната страница носи име „Распродажба на лаптопи Technomarket“ и е новоформирана, со само 2 објави со истата содржина – лажната наградна игра. На невистинитата Фејсбук страница од која се споделува наградната игра има само 15 следачи, а на вистинската страница на „Техномаркет“ има над 180 илјади следачи.

Оттаму јасно е дека брендот не само што не доделува лаптопи за 120 денари туку и дека доколку би постоела наградна игра од кој било вид, таа би била споделена од официјалната страница и би била верифицирана што во случајов не е така.

Поради сите горенаведени факти објавата што ја рецензираме ја оценуваме како невистина.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар