Текст полн со партиски констатации и неистражени факти

 

Пишува: Весна Коловска

Анализираме текст  објавен на bregalnicki.mk под наслов „Проектот за хидросистемот “Злетовица” заборавен од власта на СДСМ, ќе заживее од првиот ден од доаѓањето на власт на ВМРО-ДПМНЕ“, наслов кој што сам по себе констатира.

Текстот заспочнува со редица заклучоци и коментари, а во функција на видео порака, со пишан текст од обраќањето на кандидатот за пратеник од Пробиштип во Изборната единица број 3, Маријан Миленковски.

При тоа авторот пишува:

Еден од најзначајните капитални проекти во Брегалничкиот регион веќе 4 година стои оставен сам на себе. Реализацијата на проектот за изградба на Хидросистемот “Злетовица” во неговата прва фаза започна во времето на претходната влада предводена од ВМРО-ДПМНЕ, по што по политичката криза во 2015 и 2016 година наметната од СДСМ истиот беше ставен во мирување.

Насловот, како и остатокот од новинарскиот текст, кој одвај е раграничен од партиското обраќање, е коментаторски, навивачки и не создава дистанца на новинарот од политичкиот субјект, во случајот кандидатот за пратеник.

Кодексот на новинари во член 14 предвидува:

Известувањето од политичките процеси, посебно од изборите треба да биде непристрасно и избалансирано. Новинарот мора да обезбеди професионална дистанца од политичките субјекти.

Во овој дел од текстот не се прави разлика меѓу вест и коментар, ниту пак се разграничува што е новинарски тескт а што партиско обраќање. Текстот нема автор, а се има впечаток дека е соопштение во прилог на видео материјалот.

Понатаму во текстот следи заклучок, како вовед на видеото од обраќањето на кандидатот за пратеник, дека „доаѓањето на власт на СДСМ не значеше ништо за овој клучен инфраструктурен проект затоа што не се потегна никаква активност за негова реализација“.

Членот 1 од Кодексот на новинари укажува:

Новинарот треба да објавува точни, проверени информации и нема да прикрива суштински податоци и да фалсификува документи. Доколку информацијата не може да се потврди, или станува збор за претпоставка, односно шпекулација, тоа треба да се каже и да се објави. Точноста на информацијата треба да се провери колку што е тоа можно.

Авторот на текстот не се потрудил да ја провери точноста на информацијата. Вистиномер се обрати со директорот на Хидросистемот „Злетовица“, Миле Илиевски, кој негираше дека проектот е ставен во мирување. Меѓутоа,  точно е дека до сега не успеале да земат кредит за втора и трета фаза, како што тоа во видеото го тврди кандидатот за пратеник Миленковски.

ХС „Злетовица“ во 2013 година доби грант од еден милион евра за изработка на техничката документација за втората и третата фаза од проектот. Поради коруптивни тендери од претходната власт, грантот, чие завршување е услов за добивање  на кредит,  и по седум години не успеа целосно да се реализира. До сега се реализирани 70 отсто од грантот. Меѓутоа, не е точно дека проектот е во миурување, бидејќи во меѓувреме се обезбедени средства за филтер станици во три општини, за изградба и адаптација на станиците. Во Општина Карбинци почна изградбата, додека во Штип заврши јавната набавка, изјави Илиевски.

Директорот Илиевски објасни дека тече рокот даден од Европската инвестициона банка (ЕИБ) од две години  за затворање на грантот. По ова се очекува одобрување на кредит.

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Овој напис е изработен во рамките на Проектот за зголемување на отчетноста и одговорноста на политичарите и партиите пред граѓаните, Вистиномер, имплементиран од Метаморфозис. Написот e овозможен со поддршка на американската непрофитна фондација (NED - National Endowment for Democracy). Содржината на рецензијата е одговорност на авторот и не ги одразува ставовите на Метаморфозис и National Endowment for Democracy или нивните партнери.