Украина нема официјален став за Гренланд, ниту пак, презела обврска да ја брани Данска

Објавата се повикува на украинскиот веб-сајт Страна.уа, оценет како еден од најмалку доверливите сајтови во Украина, со честа употреба на манипулативни наслови и содржини блиски до руската пропаганда. Во јавноста досега нема јасен официјален став од Украина околу иднината на Гренланд. Украина не се вклучува директно во спорот за Гренланд на ниво како што тоа го прават данските, европските или НАТО земјите. Исто така, не постои никаква јасна одредба во Договорот меѓу Украина и Данска од 2024 година, според која Украина би била должна да ѝ помогне на Данска ако таа биде нападната од која било држава. Анализата на текстот на Договорот покажува дека обврските се главно од Данска кон Украина, а не обратно

 

Анализираме објава на социјалната мрежа Фејсбук која вели:

Украина информираше дека нема да ѝ помогне на Данска во случај да биде нападната од американската војска и покрај тоа што потпишаа договор за безбедност во 2024 година, бидејќи Украина изјави дека никогаш не ѝ ветила ништо на Данска, освен дека Данска е таа што ветила дека ќе ѝ помогне на Украина во борбата против Русија. Овој извештај е објавен од украинскиот официјален новински портал Strana.ua.

Тврдењето содржано во објавата, дека Украина информирала оти нема да ѝ помогне на Данска ако САД ја нападнат и покрај тоа што потпишале договор за безбедност во 2024 година, според достапните факти е неточно.

Имено, Украина и Данска во февруари 2024 година потпишаа Договор за безбедносна и стратешка соработка што ќе трае 10 години и има за цел долгорочна поддршка за Украина, пред сé во контекст на одбраната и помош во конфликтот со Русија.

Главните обврски во Договорот се за поддршка од Данска кон Украина: воена помош, опрема, тренинг, помош во развој на одбранбена индустрија и други форми на соработка.

Во Договорот има механизми за консултации во случај на воена закана или напад, што е вообичаено во билатерални договори, но тоа не значи автоматски обврска за Украина да испраќа вооружени сили на страна на Данска.

Не постои никаква јасна одредба во Договорот со Данска според која Украина би била должна да ѝ помогне на Данска ако таа биде нападната од САД или од која било друга држава. Анализата на текстот на Договорот покажува дека обврските се главно од Данска кон Украина, а не обратно.

Во однос на Гренланд, нема јасен официјален став од Украина, односно Украина не се вклучува директно во спорот околу иднината на Гренланд (на пример дали САД треба да го купат/анектираат, или како да се брани) на ниво како што тоа го прават данските, европските или НАТО земјите. Наместо тоа, другите актери имаат објавени позиции.

Данска и Гренланд јасно кажаа дека Гренланд е дел од Кралството Данска, дека неговата безбедност е во рамките на НАТО и дека потенцијалните промени треба да бидат одлука на Данска и народот на Гренланд.

Европски земји и ЕУ ја поддржуваат сувереноста на Данска над Гренланд и сметаат дека статусот на островот треба да го одредат Гренланд и Данска, без странски притисоци.

Некои НАТО сојузници (пр. Германија, Франција, Велика Британија) исто така истакнуваат дека НАТО и европските земји треба да работат заедно за безбедноста на Арктикот, но не се вклучуваат специјално со конкретни обврски за Гренланд од страна на Украина.

Во јавноста нема познато официјално соопштение од украинскиот претседател Володимир Зеленски или Министерството за надворешни работи што дава специфична позиција околу Гренланд и актуелните дискусии за неговата иднина (пример: против или за купопродажба, или за ангажман во одбрана). Ваква изјава досега не е документирана од кредибилни извори.

Украина е фокусирана на своите безбедносни интереси поврзани со сопствената територијална одбрана и поддршка на европските партнери за поранешниот договор со Данска, но тоа не значи дека Киев официјално се вклучил со став за Гренланд.

Што се однесува до медиумот на кој се повикува објавата што ја анализираме, вреди да се спомне дека медиумски аналитичари и организации често ја опишуваат украинската веб-страница Страна.уа како недоволно кредибилен извор со високо ниво на пристрасност или дезинформации. Тој бил оценет како еден од најмалку доверливите сајтови во Украина, со честа употреба на манипулативни наслови и содржини блиски до руската пропаганда.

Инаку, на 20 август 2021 г. Националниот совет за безбедност и одбрана на Украина (НББ) воведе персонални санкции против Игор Гужва (сопственикот на Страна.уа) и правните субјекти поврзани со Страна.уа, наведувајќи дека шири проруска пропаганда

Постојат и критички извештаи од украински организации кои го обвинуваат медиумот дека повторува наративи од руски пропагандни извори и селективно ја претставува реалноста.

Од сето погоре можеме да заклучиме дека објавата што ја анализираме е невистинита.

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар