Вакцините против ковид се безбедни и ефикасни

Вакцините се безбедни, ефикасни и спасуваат животи. Пред да бидат одобрени од страна на релевантните регулаторни агенции, вакцините се предмет на ригорозни клинички испитувања за да се тестира нивниот квалитет, безбедност и ефикасност. По одобрувањето, тие продолжуваат внимателно да се следат за континуирана безбедност и ефикасност

Рецензираме објава на социјалната мрежа Фејсбук во која пишува:

Секој доктор кој сè уште верува дека вакцините на Бил Гејтс против Ковид се “безбедни и ефикасни“ треба веднаш да бидaт обвинети и испратени во доживотен затвор… !!!

Во склоп на објавата е фотографија од Бил Гејтс со шприц во рацете. Преку фондацијата „Бил и Мелинда Гејтс“, Гејтс финансираше и поддржа напори за развој на вакцините против ковид-19 и други мерки за спречување и контрола на пандемијата. Фондацијата вложи значителни средства во глобалната здравствена инфраструктура и во програмите за вакцинација. Гејтс јавно објаснуваше како функционираат модерните вакцини, вклучително и мРНК вакцините. Тој поддржа програми за глобален пристап до вакцини, особено во земјите со ниски приходи. Гејтс не ги измисли вакцините против ковид-19, тие беа развиени од научници и компании, како „Фајзер“/„Бионтек“, „Модерна“, „АстраЗенека“ итн. Тој не поседува патент за вакцините против коронавирусот.

Бил Гејтс беше финансиски поддржувач, донатор и јавен застапник за напорите за развој, производство и глобална достапност на вакцините против ковид-19, но не е научник, не ги измислил вакцините и нема патенти поврзани со вакцините.

Прегледот на клинички испитувања (randomized controlled trials) за неколку вакцини, покажува дека вакцините ја намалуваат веројатноста од симптоматски ковид-19 со високо ниво на ефикасност. Голема мета‑анализа покажа дека мРНК вакцините имаат околу 94.6 проценти ефективност, а вектор‑вакцините (и другите типови) околу 80.2 проценти, во спречување на ковид 19. Покрај тоа, прегледот на податоци за реална употреба (после клиничките студии) покажува дека вакцините значително ја намалуваат тежината на болеста, како и ризикот од хоспитализација и смрт. Низа прегледи оценуваат дека мРНК‑вакцините се безбедни — при што вообичаените несакани ефекти се благи и минливи (на пример: болка на местото на вакцинација, замор, главоболка, температура) — а сериозните несакани ефекти се ретки.

Организации како Светската здравствена организација ги регистрираат мРНК‑вакцините како вакцини со добро утврдена безбедносна и ефикасна статистика: тие не содржат жив вирус, не влијаат на човечката ДНК, а пред клиничките испитувања биле темелно испитувани.

Вакцините се безбедни, ефикасни и спасуваат животи. Пред да бидат одобрени од страна на релевантните регулаторни агенции, вакцините се предмет на ригорозни клинички испитувања за да се тестира нивниот квалитет, безбедност и ефикасност. По одобрувањето, тие продолжуваат внимателно да се следат за континуирана безбедност и ефикасност.  

Вакцинацијата против ковид претставува слободен избор на граѓаните и тие не се задолжителни во земјава, односно секој граѓанин пред да ги прими во текот на пандемијата, потпишуваше изјава за информирана согласност на вакциналните пунктови.

Поради сите горенаведени факти објавата што ја рецензираме ја оценуваме како невистина.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар