Владата не најавила федерализација и внесување на Бугарите во Уставот по изборите

Изборите кои претстојат се локални избори и на нив не се отвораат теми од областа на внатрешната и надворешната политика, туку локални теми. Во кампањата во ниту еден момент не било спомнато спроведување на некаква федерализација, ниту пак, владата најавила дека по избори ќе ги внесе Бугарите во Устав

Анализираме објава на социјалната мрежа Фејсбук која вели:

ОД ВЛАДАТА НАЈАВУВААТ ПО ИЗБОРИТЕ БУГАРИТЕ ВО УСТАВ И ФЕДЕРАЛИЗАЦИЈА ..ЗАТОА ШТО ВО ЗАПАДНА МАКЕДОНИЈА СИТЕ ГРАДОНАЧАЛНИЦИ ЌЕ БИДАТ АЛБАНЦИ….НЕ СЕ ОТКРИВААТ ДЕТАЛИ ЗА НАРОДОТ ДА ИЗЛЕЗИ ДА ГЛАСА ПАРДОН ДА НЕ СЕ НАРУШЕЛА КАМПАЊАТА..Премиерот и Владата се одлучни за надминување на спорот со Бугарија по изборите…Кај премиерот и Владата постои сериозна одлучност и заинтересираност по изборите да се преземат конкретни чекори за надминување на спорот со Бугарија, изјави денеска министерот за европски прашања Орхан Муртезани на заедничката прес-конференција во Скопје со неговиот фински колега Јоаким Странд

Не е точно дека од Владата најавиле оти по избори ќе бидат внесени Бугарите во Устав и дека во Македонија ќе се спроведе федерализација.

Точно е дека еден од условите за напредок на земјава во преговорите со ЕУ е да се вметнат Бугарите како „една од заедниците“ во Уставот на Северна Македонија. Тоа значи дека се дискутира промената на Уставот за да се признаат и Бугарите како една од етничките заедници.

ВМРО-ДПМНЕ и поединци претходно веќе јавно реагираа дека таквите предлози може да претставуваат закана за македонскиот идентитет или да отвораат простор за ревизии на историски прашања.

Некои пишуваа и што би се случило теоретски ако се вметнат Бугарите во Устав – кантонизација, федерализација, албанизација како потенцијални сценарија.

Но тоа се анализи и предупредувања, а не официјални владини програми со јасни детали.

Не постои ниту еден документ, службена изјава или владина стратегија кои јавно објавуваат дека по изборите ќе се премине на федерален систем, или дека поширока територијална поделба (посебно со етничка основа) е договарана. Такво нешто нема во владината програма на ВМРО-ДПМНЕ.

Тврдењата дека „сѐ е веќе договорено и само се крева прагот за да не се наруши кампањата“ звучат како шпекулации и тие може да бидат дел од политичка реторика, создавање страв или мобилизација меѓу гласачите.

Доколку навистина се разгледува промена на Уставот, тоа е сложен процес кој бара двотретинско мнозинство во Собрание, јавна дебата, можеби референдум — не е нешто што може да се имплементира „секојдневно“ без широк консензус.

Премиерот Христијан Мицкоски често истакнува дека би го поддржал внесувањето на Бугарите во Преамбулата/Уставот само ако се обезбедат јасни гаранции дека тоа ќе биде конечен услов и дека нема да се поставуваат нови вета или дополнителни уцени. Тој бара Бугарија да ги исполни обврските што веќе ги прифатила (на пример, Спогодбата за добрососедство) и да ги гарантира правата на Македонците во Бугарија. Исто така, тој бара гаранции дека ако се промени Уставот, тоа да не значи нови услови (нова блокада и сл.), односно дека промената ќе значи крај на отворените прашања.

Значи, ставот на Мицкоски не е „апсолутно против“ внесување на Бугарите во Устав. Тој е поддржувач на идејата под одредени услови и гаранции. Тоа што бара е: да се гарантира дека промената на Уставот нема да биде основа за нови услови или вета, писмени и правно обврзувачки гаранции, временски или други услови (на пример ратификација од Бугарија) пред таа промена да стане активна.

Изборите кои претстојат се локални избори и на нив не се отвораат теми од областа на внатрешната и надворешната политика, туку локални теми. Во кампањата во ниту еден момент не било спомнато спроведување на некаква федерализација, ниту пак, Владата најавила дека по избори ќе ги внесе Бугарите во Устав.

Очигледно е дека тврдењата во објавата се шпекулативни и изнесени без никакви докази и аргументи. Поради тоа истата ја оценуваме како невистина.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар