Во МАЛМЕД досега пристигнале 231 пријава за несакани ефекти после вакцинација
Во Центарот за фармаковигиланца* во Агенцијата за лекови и медицински средства МАЛМЕД, пристигнале 133 пријави за несакани ефекти после вакцинација против ковид-19, кои ги поднеле лекари. Вкупно 88 пријави за несакани ефекти доставиле фармацевтите, а 10 другите здравствени работници. Досега во земјава се аплицирани 1.694.373 дози вакцини, а ревакцинирани се 47 проценти од полнолетните граѓани во државата
Во Центарот за фармаковигиланца* во Агенцијата за лекови и медицински средства МАЛМЕД, пристигнале 133 пријави за несакани ефекти после вакцинација против ковид-19, кои ги поднеле лекари. Вкупно 88 пријави за несакани ефекти доставиле фармацевтите, а 10 другите здравствени работници. Досега во земјава се аплицирани 1.694.373 дози вакцини, а ревакцинирани се 47 проценти од полнолетните граѓани во државата
Пишува: Мирослава Бурнс
Директорот на МАЛМЕД, Лирим Шабани, вели дека несаканите ефекти се во рамките на оние што се наведени во упатството на вакцините, меѓу кои: гадење, болка во рацете и нозете, болка во местото на апликација на вакцината, вртоглавица и дека, во глобала, станува збор за мал процент на несакани ефекти. Пријавата се врши со пополнување на следниот образец поставен на веб-страницата на МАЛМЕД, а кој е наменет за здравствените работници.
Што се случува со пријавите за несакани ефекти откако ќе пристигнат во МАЛМЕД?
Откако пријавите ќе пристигнат во МАЛМЕД, тие најпрвин се разгледуваат. Потоа се испраќаат во центарот за мониторинг во Шведска, УПСАЛА и се собираат од цел свет. Потоа, ако има многу пријави за иста медицинска состојба, се проверува дали можеби вакцината има и некој друг несакан ефект којшто не е наведен во нејзиното упатство за користење.
Таков беше случајот со миокардитис како несакан ефект во ретки случаи после вакцинација со Фајзер вакцината. Се утврди откако се пушти вакцината во употреба и тоа од страна на Европската агенција за лекови (ЕМА). Така и ние дадовме соодветна варијација дека можен несакан ефект од вакцинација е и тоа. Генерално, сакам да кажам дека процентот на несакани ефекти е мал, рече директорот на МАЛМЕД, Лирим Шабани.
Во Центарот за фармаковигиланца, до 31 октомври годинава, пријавени се сомнежи за два смртни случаи после примање вакцина против ковид-19. Сомнежите не се потврдени, но МАЛМЕД ги испратила добиените пријави и до УПСАЛА и до Институтот за јавно здравје. Едниот човек примил вакцина на „Фајзер“, а другиот на „АстраЗенека“.
Станува збор за пријава на смрт кај 53 годишен маж, после примена вакцина комирнати на „Фајзер“. Оваа пријава е регистрирана во септември. Исто така, има и пријава за 85 годишен маж после примена вакцина на „Астра Зенека“, пријава која е дојдена во април месец. И двата случаи ги пријавиле лекари, 24 часа после смртта. Едното лице починало две недели после примањето на вакцината. Ова не се потврдени информации затоа што ако се појави реакција, не значи дека е последица на вакцината. Треба да се испита од што боледувало лицето претходно, какви лекови земало. За едниот од починатите, го разгледав досието, навистина имаше голем број коморбидитети, рече раководителката на сектор во МАЛМЕД, Мерием Хаџихамза.
Во центарот за фармаковигиланца се собираат информации за несаканите ефекти за сите лекови и секој може да пријави несакан ефект, дури и ако само се сомнева дека има причинско последична врска меѓу администрираниот лек и несаканиот ефект.
Директорот на МАЛМЕД, Шабани, на ова се надоврза и рече дека треба да се даде фокус на 99 проценти успешно спроведениот поставен систем за вакцинација кој функционира и дава резултати. Тој потенцираше дека кога ќе се стави фокус на големиот број администрирани дози, бенефитите од вакцинацијата далеку ги надминуваат нејзините ризици.
Шабани додаде дека во земјава досега се уништени вакцини од „Фајзер“, „Астра Зенека“ и „Синофарм“ поради истечен рок, промена на вакцината откако патувала во ладниот ланец кој бил прекинат. Досега со една доза вакцина во земјава се имунизирани 58 проценти од полнолетните граѓани во земјава. Две дози примиле 48 проценти од граѓаните над 18 години.
Надлежните во Агенцијата за лекови велат дека не ги доставуваат пријавите за несакани ефекти во Европската агенција за лекови, туку само во шведскиот мониторинг центар УПСАЛА. Во Комисијата за фармаковигиланца на ЕМА, учествуваат само членови од земјите членки на ЕУ.
Ние црпиме податоци оттаму за тоа што се случува на европско ниво и ја следиме ситуацијата, но немаме пристап до базата за да праќаме пријави, велат од МАЛМЕД.
Во образецот за несаканите ефекти се наведува дали станува збор за бремена жена, дали пријавува болница, општ лекар, специјалист или фармацевт, опис на несаканата реакција на лекот, дали поврзаноста меѓу несаканата реакција и лекот е сигурна, веројатна, можна, малку веројатна или не може да се класифицира. Оваа оценка на медицинскиот работник се наоѓа во пријавата. Треба да се наведе и исходот од несаканата реакција, кој може да биде оздравување без последици, оздравување со последици, несакано дејство во тек, смрт, загрозување на животот или непознат. Се наведува и серијата на вакцината, датумот на нејзиното примање, медицинската историја, дали пациентот земал и други лекови и слични информации. МАЛМЕД не е одговорна да утврди дали има причинско-последична врска меѓу вакцината и настапената смрт. Таква одговорност има Институтот за јавно здравје, каде што двете пријави за сомнение за настапена смрт после вакцина се наоѓаат во моментот.
*(pharmacovigilance (анг.) – наука и активности кои се однесуваат на откривање, проценка, осознавање и превенција на несакани ефекти или било кој друг проблем поврзан со лековите)
![]()
Овој напис е изработен во рамките на Проектот за брзо справување со вакциналните дезинформации, имплементиран од Фондацијата Метаморфозис. Тој е првично објавен во Вистиномер, а e овозможен со поддршка на Балканскиот фонд за демократија, проект на Германскиот Маршалов фонд на САД (BTD – The Balkan Trust for Democracy, a project of the German Marshall Fund of the United States). Содржината на написот е одговорност на авторот и не секогаш ги одразува ставовите на Метаморфозис, БТД или нивните партнери.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар