ХААРП не влијае на воздухот, ниту на човековото расположение и мисли

Не е вистина дека ХААРП има моќ да влијае врз тропосферата или стратосферата каде што летаат авионите и каде што се формираат метеоролошките процеси. ХААРП наспроти изнесеното во објавата што ја рецензираме, нема моќ да влијае врз расположението на луѓето, односно да ги прави нерасположени.

Тоа е теорија на заговор која што е пласирана од поодамна и се протега на бројни климатски промени, земјотреси, природни катастрофи. Било која временска промена или природна непогода, се злоупотребува од теоретичарите на заговори за да се дезинформира дека ХААРП е виновникот за тоа.

Во случајот на објавата што ја рецензираме, станува збор за базично неразбирање на тоа што оваа програма може, а што не може да направи.

ХААРП е високо фреквентна активна истражувачка програма на поларната светлина кој е заеднички проект од различни партнери: индустријата, американското министерство за одбрана и бројни универзитети ширум САД. Научниците направија лабораторија во Гакони, Аљаска, и инсталираа 180 високофреквентни антени, кои заедно можат да емитираат 3.600 киловати радио бранови на фреквенциите од 2.8 до 10 мегахерци (високфреквентен ранг), што им овозможува на особено чувствителните инструменти да ги измерат физичките процеси кои се одвиваат во тој појас.

Работата на истражувачкиот објект беше префрлена од Воздухопловните сили на САД на Универзитетот во Алјаска, Фербенкс, на 11 август 2015 г., дозволувајќи му на ХААРП да продолжи со истражување на јоносферската феноменологија преку договор за соработка за истражување и развој за користење на земјиштето.

Поради вградени нови технологии, САД овие антени ги употребуваат и во комуникациите и во особено длабоките делови од морињата или земјата. Но, не е точно тврдењето дека овие антени можат да влијаат врз промените на климата.

На официјалната веб-страница на проектот се вели дека „ги проучува својствата и однесувањето на јоносферата“:

Јоносферата се протега на околу 50 до 400 милји над површината на Земјата, точно на работ на вселената. Заедно со неутралната горна атмосфера, јоносферата ја формира границата помеѓу долната атмосфера на Земјата – каде што живееме и дишеме – и вакуумот во вселената.

Радио преносите од ХААРП предизвикуваат само мали ефекти во јоносферата кои траат краткотрајно, неколку секунди. Нема докази дека ХААРП може да предизвика природни катастрофи или да влијае врз човековите движења и мисли.

Наспроти изнесеното во постот што го рецензираме, на страницата на Универзитетот Алјаска, во делот со прашања и одговори односно факти и митови, на прашањето дали ХААРП може да го контролира или манипулира времето – временските прилики, одговорот е негативен.

Не. Радиобрановите во фреквенцискиот опсег кој го трансмитира ХААРП не се апсорбираат ниту во тропосферата, ниту во стратосферата, а тоа се двете нивоа на атмосферата одговорни за временските прилики на Земјата. Бидејќи нема интеракција, нема можност ХААРП да го контролира времето. ХААРП системот е голем радиотрансмитер. Радиобрановите имаат интеракција со електричните полнења и струи и немаат значајна интеракција со тропосферата. Понатаму, ако јоносферските бури предизвикани од Сонцето немаат ефект врз временските прилики, тогаш нема шанса ниту ХААРП да го прави тоа. Електромагнетните интеракции се случуваат само во блискиот вакуум на редок, но електрично наполнет регион на атмосферата, на околу 60 до 80 километри, познат како јоносфера. Јоносферата се создава и постојано се надополнува, додека сончевото зрачење е во интеракција со највисоките нивоа на атмосферата на Земјата, пишува на сајтот каде се објаснува за ХААРП.

Според истата страница, нема ниту долгорочни ефекти од јоносферското загревање.

Инаку, теоријата на заговор дека ,,ХААРП може да влијае на расположението на луѓето на начин што може да ги напаѓа луѓето и нивните мисли да ги носи на високи и ниски фреквенции и вибрации” веќе е дебанкирана од Сајнс Фидбек.