АНАЛИЗА: Се стопија амбициите за „инвестициски бум”, има институции и со 0 реализација за шест месеци

Најавите за „бум” на јавните инвестиции останаа само на хартија, како буџетска неостварена проекција. Со ребаланс на Буџетот се кратат 300 милиони евра од капиталните расходи. Иако беше најавена агресивна политика за јавни инвестиции, полугодишните податоци од Министерството за финансии покажуваат дека има институции кои имаа нула реализација, а најголем дел од министерствата не успеале да остварат ниту една третина од планираните капитални расходи во период од шест месеци, пишува Порталб.мк

Кои министерства колку пари потрошиле за инвестиции

Министерствата со различен степен на реализација на јавните инвестиции, за шест месеци голем дел не успеале да остварат барем една третина од планираните, а на една рака се бројат оние кои надминале 50 отсто реализација.

Од ресорите кои располагаат со милионски износи за капитални инвестиции, со најниско ниво на остварување се: Министерството за одбрана кое од расположливите скоро 102 милиони евра во првата половина од годината потрошило близу 22 отсто, Министерството за внатрешни работи од 14,5 милиони евра за капитални расходи реализирало 22,7 отсто, Министерството за земјоделство од 15,5 милиони евра за инвестиции потрошило 22,4 отсто, Министерството за надворешни работи од планираните 521.000 евра реализирало само 12,07 отсто, Министерството за финансии од скоро 10 милиони евра за шест месеци потрошило 20,7 отсто, а Министерството за финансии – функции на држава од 55,3 милиони евра реализирало 53,2 отсто. Министерството за труд и социјална политика реализирало 32,2 отсто, а Министерството за образование од скоро 30 милиони евра за капитални расходи потрошило близу 27 отсто.

Министерството за животна средина има реализација од само 12 отсто од планираните 20,6 милиони евра, Министерството за здравство од вкупниот буџет за инвестиции во износ од 9,5 милиони евра потрошило 30 отсто, а МИОА од расположливите 2,5 милиони евра за шест месеци реализирало 23,4 отсто. Министерството за политички систем од планираните 36.500 евра потрошило 34,5 отсто, Министерството за правда реализирало 3,08 отсто, а Министерството за локална самоуправа од капиталните инвестиции во износ од 60.000 евра реализирало 27 отсто.

Во групата ресори со повисок процент на реализација на капиталните расходи се Министерството за економија, кое од расположливите 5,1 милион евра, за јавни инвестиции потрошило 73 отсто, Министерството за транспорт реализирало 61,3 отсто од планираните 305,5 милиони евра, а Министерството за култура е со остварување од околу 40 отсто.

Институции и со „нула” реализација на инвестиции

Собранието на РСМ кое во сегашниот буџет има на располагање 1,7 милиони евра, на крајот од првото економско полугодие реализирало 19,1 отсто.

Со „нула” реализација на капитални расходи се: Државната изборна комисија со буџет за инвестиции од 41.300 евра, Фискалниот совет, Инспекцискиот совет кој имаше на располагање дури 300.000 евра за капитални расходи, а во оваа група се и: Совет за управување и надзор на ревизијата, Инспекторатот за употреба на јазици, Државниот инспекторат за животна средина, Државниот инспекторат за шумарство, Државниот санитарен инспекторат и уште неколку други инспекторати и тие главно располагаат со пониски расположливи износи за капитални расходи.

Интересни се институциите задолжени за безбедноста. Така, ОТА (Оперативно – техничка агенција) која од вкупниот буџет за капитални инвестиции во износ од 3 милиони евра реализирала само 0,23 отсто, како и Агенцијата за национална безбедност која од расположливите 1,5 милиони евра за шест месеци потрошила 0,11 отсто. Во оваа група е и Управата за извршување на санкции каде од планираните 3,1 милион евра, по основ на капитални расходи биле потрошени само 0,81 отсто. Со слаба реализација од само 1,33 отсто од вкупно 2,2 милиони евра е Управата за јавни приходи, додека Секретаријатот за европски прашања кој со моменталните буџетски позиции има на располагање 50.100 евра, реализирал околу 2 отсто.

Судската власт, за која беа планирани 2,2 милиони евра за капитални расходи, за шест месеци реализирала 8,6 отсто, кај Јавното обвинителство реализацијата е скоро 50 отсто, а Советот на јавни обвинители потрошил близу 60 отсто од планираните средства за капитални расходи.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар