Честитките за крајот на ковид 19 се сензационализам, што е вистината за лекот Евушелд?

Преку напис на порталот ,,Банер” на лажен начин новинарот им честита на своите читатели за, како што тој го нарекува, „откритието на векот“ што ќе и стави крај на пандемијата со ковид 19. Новинарот на Порталб.мк истражуваше за лекот ,,Евушелд”, но за него уште нема конкретни податоци за ефикасност, безбедност и квалитет. Од Светската Здравствена Организација и Европската Агенција за Лекови кои вршат испитување на овој лек, велат дека засега единствена надеж остануваат вакцините, пишува Порталб.мк.

Веста што ја рецензираме преку сензационализмот во насловот и во неколку параграфи од содржината, ја менува вистината за лекот „Евушелд“ и го прикажува истиот како нешто што веднаш ќе го елиминира коронавирусот.

„Честитки, ЕУ само што се подготвува за откритието на векот, еве што ќе го елиминира ковидот за час. Според податоците, Астра го развила комбинираниот лек Евушелд, кој има за цел да ја спречи болеста кај возрасните“, пишува во веста што ја рецензираме.

Но, што е всушност вистината за ,,Евушелд”?

Да, вистина е дека Европската Комисија започнала со испитување на лекот Евушелд (инаку познат и како AZD7442), кој е комбинација на две моноклонални антитела (tixagevimab и cilgavimab), кој го развива АстраЗенека (LSE:AZN) за спречување на Ковид-19 кај постарите лица, но тој сеуште е во рана фаза и не е единствениот лек кој актуелно се испитува.

Развивањето на овој лек продолжи една недела откако англиската и шведска компанија за лекови побара од Американската Агенција за храна и лекови итно одобрување на AZD7442.

Одлуката на Комитетот за медицински продукти за хумана употреба за започнување со испитување на овој лек се заснова на прелиминарните резултати од претходните клинички студии, кои покажале дека овој лек може да помогне во борбата против вирусот. Европската агенција за лекови почнала со евалуација на податоците од лабораториските студии и оние направени врз животни (неклинички податоци).

Европската агенција за лекови ќе ги евалуира податоците за квалитетот, безбедноста и ефективноста на овој лек. Тестирањето на лекот ќе продолжи се додека не се добијат доволно докази за него и сите негови можни ефекти, по што компаниите ќе можат да поднесат формално барање за негово пласирање на пазарот.

Европската Агенција за Лекови овој лек ќе го третира во согласност со вообичаените стандарди на Европската Унија што се користат за испитување на ефикасноста, безбедноста и квалитетот на лековите пред да даде зелено светло за нивна употреба. Засега од оваа агенција не сакаат да шпекулираат за времетраењето на овој процес, и оттаму изјавија дека е извесно дека ќе биде пократко од вообичаено поради актуелната вонредна состојба.

Како ќе делува овој лек?

Овој лек се состои од tixagevimab и cilgavimab, две моноклонални антитела. Тixagevimab и cilgavimab се дизајнирани за да се врзат за шилестиот протеин на Сарс КоВ 2 (вирусот што предизвикува Ковид-19) во два различни дела. Врзувајќи се со шилестиот протеин, лекот се очекува да го спречи вирусот да навлезе во клетките на телото каде што тој предизвикува инфекција. Бидејќи антителата се дистрибуираат во различни делови на протеинот, нивното комбинирано користење може да биде поефективно од користењето на само еден од нив.

Вакцините се потпираат на имунолошкиот систем за да развијат антитела и клетки кои ќе се борат против инфекцијата, биотехничкиот состав на АстраЗенека наречен Евушелд, содржи лабораториски антитела дизајнирани да останат во телото со месеци.

За овој лек е докажано дека делува кај луѓе кои не се заразени, а исто така оваа недела беше докажано дека може да спаси животи и да спречи тешка форма на болеста, доколку се примени во првите недели по појавата на симптомите.

„Европската Агенција за лекови ќе ги евалуира сите податоци за квалитетот, безбедноста и ефективноста во моментот кога истите ќе бидат готови” изјавија од оваа Агенција.

Засега единствен одобрен лек е Ремдесивир

Ремдесивир е првиот и единствен лек одобрен од ФДA за лекување на Сарс КоВ 2. Се користи во многу земји за лекување на возрасни лица хоспитализирани поради Ковид-19, како и за деца од 12-годишна возраст, но чија телесна тежина е најмалку 40 килограми.

Раниот третман на оваа болест со овој лек може да спречи сериозни или фатални последици од вирусот, особено кај високоризичните пациенти, односно оние со други придружни болести и слаб имунитет.

Засега, единствена надеж за спечување на болеста остануваат вакцините

Светската Здравствена Организација до сега има одобрено седум вакцини кои се оценувани како сигурни и за кои се тврди дека спречуваат појава на тешка форма на болеста предизвикана од Ковид-19.

Од СЗО се одобрени следните вакцини: Модерна, Фајзер/Бионтек, Џонсон и Џонсон, АстраЗенека, Ковишилд, Синофарм и Синовак. До денес, одобрена вакцина во повеќето земји е онаа на AстраЗенека, и тоа во вкупно 124 земји.

Инаку, некои лекови кои главно се базираат на лабораториски произведени антитела и кои се испитуваат и оценуваат од Европската агенција за лекови, се: GSK – Vir, sotrovimab и Lillys cocktail. Ремдесивир е единствениот лек одобрен од Европската Унија за лекување на Ковид-19.