Латас: Дали ако некој му се закани на Барак Обама, до „сабајле ќе го снема тој“

Во телефонските разговори, кои се дел од „бомбите“ на опозицијата, поточно во подолгиот разговор за кој лидерот на СДСМ, Зоран Заев, рече дека е наводно меѓу главниот уредник на Сител, Драган Павловиќ Латас и директорот на Управата за безбедност и контраразузнување, Сашо Мијалков, во еден момент Д.П. Латас, во контекст на однесувањето на сопственикот на сега веќе непостоечката А1 телевизија, Велија Рамковски, го вели следново:

Абе ти замисли, богативе луѓе као Бил Гејтс у Америка да земе да му прети на Обама, зашо е богат, па сабајле ќе го нема тој.

Разговорот во целост може да се слушне овде, а оваа изјава и контекстот во кој е кажана може да се слушна после 7 минути и 30 секунди.

Образложение:

За откривањето на вистинитоста на оваа изјава нема да објаснуваме надолго и нашироко, зашто таа тоа не го заслужува, но и зашто, за среќа, има многу готови извори на оваа тематика и нема потреба да се вршат посебни истражувања.

Овој напис на Википедија ја објаснува целата историја на закани врз претседателите на САД. Во него се вели дека максимална казна за закани против претседателот на САД е до 5 години затвор и до 250.000 долари. Нема потреба да се напомне дека законите во САД не прават разлика меѓу закани кои доаѓаат од богато и сиромашно лице. Уште повеќе, максималната казна за закана кон судија или кон полицаец изнесува 10 години, односно двојно повеќе отколку кон претседателот на САД.

Најостри казни за закана со смрт/убиство/атентат кон Обама, но кои не вклучуваат никаква акција, изречени од страна на судовите во САД, изнесуваат 27 и 33 месеци, двете во 2010 година.

Од друга страна, лице кое има испукано куршуми врз Белата Куќа, од кои барем 7 ја имаат погодено зградата, е осудено на 25 години затвор. Лица, пак, кои имаат купено оружје и бомби во вредност од 87.000 долари со цел да го убијат претседателот Обама и имаат преземено чекори и подготовки во таа насока, а патем имаат и извршено убиства врз други лица, кои им се испречиле на патот, се осудени на доживотна робија без можност за помилување.

Севкупно, во првите години од владеењето Обама добиваше по 12.000 закани годишно, што е 4 пати повеќе од неговито претходник Џорџ Буш. Над 60 отсто од заканите се преку интернет, а 65 лица досега се осудени заради закани врз Барак Обама.

Она што, сепак, е недвојбено јасно, тоа е дека никого не го „снемало до сабајле“, а особено не десетиците и десетиците илјади луѓе кои со текот на годините искажале некоја закана против претседателот – без оглед дали се богати или сиромашни.

Извори:

• Threatening the President of the United States, (Закани кон претседателот на САД) [Пристапено на: 11.03.2015] http://en.wikipedia.org/wiki/Threatening_the_President_of_the_United_States#cite_note-4
• Assassination threats against Barack Obama, (Закани со атентат врз Барак Обама) [Пристапено на: 11.03.2015] http://en.wikipedia.org/wiki/Assassination_threats_against_Barack_Obama
• Threatening Communications and Behavior: PERSPECTIVES ON THE PURSUIT OF PUBLIC FIGURES (Заканувачка комуникација и однесување: Перспективи кон следењето на јавните личности) Cherie Chauvin, Editor, Board on Behavioral, Cognitive, and Sensory Sciences, Division of Behavioral and Social Sciences and Education, NATIONAL RESEARCH COUNCIL OF THE NATIONAL ACADEMIES THE NATIONAL ACADEMIES PRESS, Washington D.C., www.nap.edu, [Пристапено на: 11.03.2015] http://www.nap.edu/openbook.php?record_id=13091
• Threats Against Obama Spiked Early, (Заканите кон Обама рано достигнаа голем број) By JEFF ZELENY and JIM RUTENBERG, Published: December 5, 2009, [Пристапено на: 11.03.2015] http://www.nytimes.com/2009/12/06/us/06threat.html?pagewanted=all
• The new dynamics of protecting a president: Most threats against Obama issued online, (Динамиката на заштитата на претседателот: Најмногу закани против Обама има онлајн), By Juliet Eilperin October 8, 2014 [Пристапено на: 11.03.2015] http://www.washingtonpost.com/politics/the-new-dynamics-of-protecting-a-president-most-threats-against-obama-issued-online/2014/10/07/a525ef6c-4b11-11e4-891d-713f052086a0_story.html

Оценил: Владимир Петрески

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар