Нема интерес за промена на изборниот модел во една изборна единица

Фото: ДИК/колаж на Вистиномер

 

Владејачката СДСМ даде ветување во предизборието во 2016 г., кое досега (30.10.2018) не е реализирано:

Ќе предложиме пратениците да се избираат по принципот на отворени листи, а Република Македонија да биде една изборна единица. На тој начин, секој глас ќе вреди подеднакво, а граѓаните директно ќе ги избираат своите претставници.

[Извор: СДСМ – План за живот во Македонија (стр.231) – датум, 2016 година]

 

ОБРАЗЛОЖЕНИЕ:

Оваа стара тема за политички дилеми во Македонија се најде и на предизборното мени на СДСМ, којa во 2016 година вети дека ако дојде на власт, веднаш ќе пристапи кон процедура за измена на изборнот модел. Ветувањето е дадено конкретизирано на стр. 231 од предизборната програма, во делот за итните реформи во првите шест месеци.

Година и половина подоцна може да се оцени дека ветувањето е нереализирано, иако, СДСМ имаше шанса за тоа пред некој месец, кога беа направени измени на Изборниот законик

Имено, Изборниот законик последен пат е изменет кон крајот на јули годинава (2018), но, иако се најде место и за промени од типот на финансирање на предизборни кампањи, каде што партиите си издејствуваа дека нивните кампањи ќе се плаќаат од Буџетот, не се најде место за промена на изборниот модел.

Кога започнаа преговорите меѓу работните групи за измени на изборното законодавство, СДСМ тврдеше дека останува на предлогот, но дека нема одговор од другата страна – ВМРО-ДПМНЕ, тогаш, иако во опозиција, сè уште најбројна политичка партија во парламентот.

Изборниот модел е од суштествена важност за демократската пракса во Република Македонија. Една изборна единица со отворени листи, со соодветен начин на пропорционално гласање и со соодветен изборен праг достижен за помалите партии, е модел кој ја поттикнува инклузивноста на различниот политички спектар, го мобилизира гласачкото тело и им овозможува на малите полтички партии или на независни кандидати да обезбедат место во Собранието на Република Македонија.

Постојниот модел, пак, им одговара само на големите политички партии. Оттука, СДСМ е во право кога вели дека не можат без другата страна да го променат моделот, но сега кога помина гужвата околу референдумот, можеби, како што е брифирано, треба да ги продолжат овие разговори кои се премногу важни за демократијата во РМ.

 

ИЗВОРИ:

 

Оценил: Тео Блажевски

 

 

 


Овој напис е изработен во рамките на Проектот за зголемување на отчетноста и одговорноста на политичарите и партиите пред граѓаните, Вистиномер, имплементиран од Метаморфозис. Написот e овозможен со поддршка на американската непрофитна фондација (NED - National Endowment for Democracy) и Балканскиот фонд за демократија, проект на Германскиот Маршалов фонд на САД (BTD – The Balkan Trust for Democracy, a project of the German Marshall Fund of the United States), иницијатива која поддржува демократија, добро владеење и евро-атлантски интеграции во Југо-источна Европа. Содржината на рецензијата е одговорност на авторот и не ги одразува ставовите на Метаморфозис, National Endowment for Democracy, The Balkan Trust for Democracy, проект на Германскиот Маршалов фонд на САД, или нивните партнери.