Божиновска: Ослободувањето на Вранишковски е мудра и државничка одлука

Од Владимир Петрески 0
Валентина Божиновска, претседател на Комисијата за односи со верските заедници. Фото: КОВЗ

 

Претседателката на Комисијата за односи со верските заедници и религиозни групи (КОВЗ), Валентина Божиновска, смета дека одлуката за ослободување на Јован Вранишковски е мудра и државничка  и дека таа ќе придонесе за поголемо православно единство:

Мудра и државничка одлука. Едноставно гледам дека тука нема ниту поразен, ниту победник. Ова е само уште еден гест на мудрата политика на Македонската православна црква – Охридска архиепископија, но и на државните институции, значи на државната политика. И, особено она што е  интересно во овој момент, е она што Македонија го прави како еден сериозен имиџ на држава која ги има потпишано сите ратификации за верските права и слободи …

[Извор: Канал 5, 0,1-0,48 сек. во прилогот. Датум: 10.01.2015]

Валентина Божиновска, претседател на Комисијата за односи со верските заедници. Фото: КОВЗ
Валентина Божиновска, претседателка на Комисијата за односи со верските заедници. Фото: КОВЗ

 

Образложение:

Оваа изјава на Божиновска  дадена  на 10 јануари 2015 година за една национална телевизија, која ја пренесоа и други медиуми, а ја има и на интернет страницата на КОВЗ, е спорна поради фактот што за случајот Јован Вранишковски има судска одлука.

Имено, на 09.01.2015 година  Кривичниот совет на одделението за организиран криминал и корупција на Основниот суд Скопје 1 донесе решение за условен отпуст на расчинетиот владика Јован Вранишковски. Аргументите  врз основа на кои Судот го донел решението биле дека:

Вранишковски има одлежано повеќе од половина од казната која изнесува 5 години и 5 месеци, неговата здравствената  состојба, како и примерното однесување со кое се издвојувал од другите затвореници“

Ваквата одлука, како што стои во соопштението од Судот, е донесена врз основа на предлогот доставен од првиот човек на КПУ Идризово, на 25-ти декември.

На 10.01.2015 година директорот на КПУ Идризово, Живко Пејковски, за Канал 5 изјави дека барањето за условен отпуст

е поднесено пред Нова година заради примерност, поминат поголем дел од издржаната казна – повеќе од половина, како  и поради прифаќање на ресоцијализацијата. (од 0,59 до 1,12 минута од прилогот)

На 12 јануари 2015 година за овој случај се произнесе и Основното јавно обвинителство за гонење на организиран криминал и корупција, кое, исто така, смета  дека „се исполнети законските услови за примена на условен отпуст за Вранишковски“.

Од друга страна, не може да се апстрахира актуелниот политички миг во кој е донесена одлуката за излегување  од затвор на Вранишковски – по посетата на висок претставник на Руската православна црква и и информациите за отворање на можности за обновување на дијалогот меѓу МПЦ-ОА и СПЦ. Ниту пак, може да се пренебрегне македонската реалност за селективна правда, пристрасни судски постапки и политички влијанија во судството, критики кои се повторуваат секоја година во извештајот на Европската комисија  за напредокот на земјава. Меѓутоа,  треба да се истакне дека  Македонија, според Уставот, е секуларна држава, а трите власти се независни една од друга.

Во таа смисла,  во членот 19 став 3 е прецизирано дека „Македонската православна црква, другите верски заедници и религиозни групи се одвоени од државата и се еднакви пред законот“ , а во членот 8 е наведено дека  „владеењето на правото и поделбата на државната власт на законодавна, извршна и судска“, се сметаат за темелни вредности на уставниот поредок.

Па, иако, е  неспорно дека на 22 декември Синодот на Македонската православна црква – Охридска архиепископија (по вонредна седница) , ги повика надлежните власти на Република Македонија да покажат милост пред божиќните празници и да го ослободат од затвор поранешниот митрополит Јован. Сепак, неговото евентуално ослободување се спроведува преку процедура судските институции во државата , односно со решение на Судот и не може да се квалификува како мудар гест на МПЦ-ОА и како државничка одлука.

 

Линкови:

 

Оценето од: Оливера Војновска

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Слични артикли

Оставете реакција

Јазици MK SQ EN