Газди и квази-новинарство: Дискредитирачки коментар маскиран во извештај

[Рецензија на напис: Кој му е газда на Пендаровски?]

Веќе самиот наслов го подготвува читателот за тоа што е намерата и каква е содржината на четивото кое му се нуди. Користејќи го исказот на Стево Пендаровски во својство на кандидат на СДСМ за претседател на државата, искажан на предизборен митинг, дека шефот на државата не смее да има газда над себе, насловот поставува прашање: кој му е газда на Пендаровски? И, веќе во првата реченица одговорот се сервира во вид на коментар – Стево Пендаровски мисли дека народот ќе заборави на неговиот газда Бранко Црвенковски. Се работи, имено, за уште еден прилог кон нововоспоставениот жанр на квази-новинарство во Република Македонија – дискредитирачки коментар маскиран во извештај од настан. Во случајов, тема беше настапот на Пендаровски на предизборен митинг во Делчево, а текстот е поместен во рубриката ПОЛИТИКА заедно со останатите политички настани, но, всушност, се работи за политички коментар, кој по системот copy-paste проциркулира низ неколку портали наклонети на владеачката политичка опција. Дека тезите потекнуваат од друг медиум дознаваме преку една срамежливата напомена на крајот од втората реченица:

„Претседателскиот кандидат на СДСМ на синоќешниот митинг  во Делчево изјави дека претседателот не смее да има газда над себе, надевајќи се дека поради овие негови зборови граѓаните ќе заборават на неговиот газда, ментор и идол, Бранко Црвенковски, пишува Курир“. 

Но, понатаму текстот тече без потсетувања од таков тип, изоставени или од небрежност, или, пак, со желба написот да делува оригинално. Сепак, нема ништо оригинално во начинот на кој медиумот преку овој напис се пресметува со личноста на претседателскиот кандидат на опозиционата СДСМ, бидејќи се нижат потсмешливи коментари на сметка на Пендаровски – дека ова бил

„провиден обид на Пендаровски да се претстави пред граѓаните како лице кое нема “газда над себе“, дека

 

„потсвеста на претседателскиот кандидат на СДСМ си работи, зошто човек од сопствената сенка не може да избега“,

 

„по директен налог на Црвенковски беше протуркан за кандидат на најголемата опозициска партија“

и слично. Во овој случај информативната компонента е комплетно занемарена за сметка на пропагандната, а тоа е направено без нималку обѕир кон стандардите на новинарското изразување.

Линк до оригиналниот напис: Кој му е газда на Пендаровски?

Датум и време на објавување: 2.04.2014, 11:36

Датум на рецензирање: 4.04.2014

Рецензент: Југослава Дуковска

 

ТВРДЕЊА МАСКИРАНИ ВО ФАКТИ

Освен цитатот од говорот на Пендаровски, одржан на предизборниот митинг во Делчево, нема ниту обид да се известува за самиот митинг на опозициониот претседателски кандидат. Изнесените тврдења се само маскирани во факти, со надеж дека како такви ќе поминат кај читателот. И во случајот на извор(и) на информацијата треба да се констатира дека единствениот извор – говорот на Пендаровски на митингот одржан во Делчево се ползува само една реченица. Останата содржина на написот е коментирање, кое нема врска со настанот.

Написот нема ниту амбиции да биде сеопфатен, тој испраќа политичка порака и објавува политичка пропаганда насочена исклучиво кон дискредитација на конкретна личност,  во случајов на претседателскиот кандидат на Социјалдемократскиот сојуз, Стево Пендаровски.  Вистината е спинувана, очигледно  е пласирањето на лаги и полувистини и нема ниту обид да се затскрие комплетно неизбалансираниот приод кој го одликува овој напис. Ова е уште еден од низата непотпишани пропагандни текстови кои со мали или никакви интервенции во содржината се копираат од еден во друг медиум.

 

ПОЛИТИЧКАТА ПРОПАГАНДА ГО ЗАСЕНУВА ИНФОРМИРАЊЕТО

Притоа, насловот е отворено навредлив кон претседателскиот кандидат на Стево Пендаровски, а таква е и интонацијата на целиот напис. Не е потребно посебно нагласување на фактот дека текстот е срочен со нескриена намера да дискредитира и дискриминира.

Пропагандните четива поместени меѓу информациите од дневни настани се евтин трик за купување на вниманието на читателите. Најголем дел од нив, сепак, успеваат да ги „прочитаат“ намерите зад ваквите написи и да ја направат разликата меѓу вистинската информација и квази-новинарството во функција на политиката.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар