Општина Аеродром повеќе од 11 години кираџија
Проект: Изградба на репрезентативна општинска зграда за потребите на општинската администрација
Опис на проектот: Изградбата на општинската зграда ќе биде на локација во Реонски центар на крстосницата меѓу населбата Јане Сандански и Ново Лисиче. Во соработка со Министерството за транспорт и врски ќе биде објавен оглас за доделување договор за воспоставување јавно-приватно партнерство за изградба на општинска зграда. (Рок: 2015 година)
ОБРАЗЛОЖЕНИЕ:
„Изградба на репрезентативна општинска зграда за потребите на општинската администрација“, најави градоначалникот на Аеродром Ивица Коневски, во неговата Изборна програма (2013-2017), Нови дела за нов напредок, нови дела за подобар Аеродром! (Комунални работи , стр. 37). Според изборните проекции на Коневски, проектот требаше да се реализира во 2015 година, но досега (20.10.2016) ова ветување не е исполнето.
Општина Аеродром веќе 11 години (од незиното основање во 2005 година) е смесетна во објект под кирија и тоа, во периодот од 2005 до март 2015 во зградата на фирмата „Брилијант“ на улицата Венјамин Манџуковски, а од април 2015 наваму седиштето на Општина Аеродром е на булевар Јане Сандански бр. 109А, во зградата на АД „Скопски пазар“, во близина на ТЦ „Капитол“.
Според Извештајот на Државниот завод за ревизија, објавен деновиве (19.10.2016), Општина Аеродром за една деценија само за кирија на општинската зграда потрошила 720.000 евра.
Наодите на ревизорот покажуваат дека од основањето на Општината во 2005 година до март 2015 година, Општина Аеродром плаќала кирија по 6000 евра месечно за објектот на улицата Венјамин Манџуковски, а од април 2015 година Општината плаќа месечна кирија од 8000 евра за просториите во зградата на Булевар Јане Сандански бр. 109 А, каде и сега е сместена.
Произлегува дека за периодот од претходните 10 години, општината по основ на закупнина има потрошено средства во износ од приближно 720.000 евра, а и понатаму е без сопствен деловен објект во кој би работела општинската администрација, пишува во Извештајот на државниот ревизор.
Инаку, постојниот проект за нова административна зграда за Општина Аеродром предвидува објект на три ката (со вкупна површина од 10.964 квадратни метри), кои ќе бидат користени само за потребите на општинската администрација.
ИЗВОРИ:
- Извор: Изборна програма на ВМРО-ДПМНЕ и Ивица Коневски (2013-2017), Нови дела за нов напредок, нови дела за подобар Аеродром! (Комунални работи, стр. 37) [Пристапено: 20.10.2016]
- Вест (25.07.2015): Зградата на аеродром без дуќани [Пристапено: 20.10.2016]
- Вечер (27.01.2015): Аеродромци бараат нов газда за под кирија! [Пристапено: 20.10.2016]
- Вест (27.01.2015): Аеродром ќе се сели [Пристапено: 20.10.2016]
- Тајм. Мк (27.03.2015): Општина Аеродром се сели во зградата на „Скопски пазар“ [Пристапено: 20.10.2016]
- Нетпрес (27.03.2015): Општина Аеродром се сели во зградата на „Скопски пазар“ [Пристапено: 20.10.2016]
- Тајм.мк (19.10.2016): Општина Аеродром за една деценија потрошила 720.000 евра за кирија [Пристапено: 20.10.2016]
- 24 Вести (19.10.2016): Општина Аеродром за 10 години потрошила 720.000 евра за кирија [Пристапено: 20.10.2016]
- Веб-страница на Општина Аеродром : [Пристапено: 20.10.2016]
Оценето од: Оливера Војновска
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
