Рецензија: Илјадници лица учествуваа во Маршот на мирот во Москва против војната во Украина
Прецизноста е исклучително значајна работа, а во новинарството е нераздвојна со категоријата точност. Илјада, неколку илјади, илјадници – несоодветната употреба на која било од овие проценки за бројност носи сериозна опасност за промашување на вистинитоста на информацијата. Но, ако во еден ист материјал се употребат сите овие бројки, тогаш добиваме новинарска турлитава.
Линк до оригиналниот напис: Илјадници лица учествуваа во Маршот на мирот во Москва против војната во Украина
Датум и време на објавување: 21.09.2014
Датум на рецензирање: 22.09.2014
Рецензент: Владимир Мирчески
НОВИНАРСКА НЕПРЕЦИЗНОСТ ЗА „ШАШМОСУВАЊЕ“ НА ЈАВНОСТА
Во насловот има употребено „илјадници“, во поднасловот „повеќе од илјада лица“, подолу во текстот се вели дека „според светските агенции во протестот учествувале 20 илјади лица“, за конечно да се даде проценката на полицијата од „околу 5 илјади учесници“. Е сега сум збунет, навистина збунет. Толку нагаѓања и лутања на толку мал простор е премногу. Точно е дека е не само новинарски неблагодарно, туку и тешко да се даде приближна, не зборуваме за точна, бројка за масовноста на некој собир, но исто така е недозволиво туку-така да се нафрлаат бројки кои не само што не ја информираат, туку ја шашмосуваат публиката. Да бидеме попрецизни, веста која самата се фали со својата „шареноликост“, не тера да проверуваме по други медиуми за да утврдиме што навистина се случило и колкумина се собрале на протестот за мир во Москва. Еве фотографија која подобро отсликува каква била посетеноста на митингот:
Да бидеме доследни, станува збор за целосно преземена агенциска вест, што е и јасно наведено, која во самото составување ја има фабричката маана со непрецизноста и забуната околу бројноста на собирот во Русија. Сепак, тоа не ја намалува новинарскатаодговорност на тој што едноставно решил да направи copy-paste на основната информација, слепо потпирајќи се на напишаното од домашната државна новинска агенција. Оттука, доаѓаме до важното професионално правило за двојна, а ако треба и тројна проверка на сѐ што се објавува и има намена да ја информира јавноста. Убаво кажал народот „Два пати мери, еднаш сечи“! Искрено, ниту содржината и на оригиналот и на копијата не е претерано опсежна и не баш коректно го опишува настанот. Впечатокот е како да се сакало, а и се прелетало, преку оваа вест, како да е нешто небитно – „протестче во Москва“.
Затоа, како заклучок следи дека имаме пример за неодговорен пристап кој резултирал со неодговорен новинарски производ.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар