Рецензија: Тежнеат да ја кројат нашата судбина, ама од кафеана

„Тежнеат да ја кројат судбината, ама од кафеана“ е исклучително пристрасен текст со тенденциозен наслов. Уште од самиот старт е видлива  идејата е да се оцрни опозицијата.

„Денес опозицијата не се појави во Парламентот. На закажаната седница на дневен ред беа пратеничките прашања, ама некому очигледно поважни му беа гастрономските. Пратеничката група на Социјалдемократскиот Сојуз реши пред  да влезе во салата да се загрее во италијанскиот ресторан „Кај Џино“.“

Овој материјал има сериозни проблеми со релевантноста. Имено, тој се повикува на друг сајт и е целосно преземен вклучувајќи го и насловот. Текстот се потпира на еднострани анонимни извори, без притоа да се направи најмал обид за да се надгради содржината – да се побара став од опозицијата. Впечаток е дека втората страна на приказната воопшто и не била планирана.

Линк до оригиналниот напис: Тежнеат да ја кројат нашата судбина, ама од кафеана

Датум и време на објавување: 28.11.2013, 19:46:59

Датум на рецензирање: 1.12.2013

Рецензент: Оливера Војновска

Вистинитост: На јавноста ѝ се наметнува перцепција дека пратеничка група на СДСМ ги запоставила работните обврски и уживала во една прилично опуштена атмосфера во италијанскиот ресторан во Центарот на Скопје.

„Надвор студено, а внатре пријатно, па како што е редот зошто да не се стартува „со по една„. Колку за да се опуштат гласните жици за да може да се биде погласен во пратеничките прашањата. Арно ама, на  опозоционата група од десетина пратеници изгледа им „легнаа„ мезето и пијалокот, па како што велат некои од присутните очевидци,  „една по една  до  сто и една„  голтка… и седницата може да почека. А ако се погоди и мезето, седницата може и да се одложи.  Кој сега ќе станува да оди на седница?“

Но, таквите наводи  во текстот не се поткрепени со ниту еден факт.

Директниот пренос на седницата прикажан на Собранискиот канал, како и прилогот насловен како „Собраниска итроштина“, прикажан на друг медиум даваат поинаква слика за крајот на заседанието и ги демантираат тврдењата во написот дека опозицијата не се појавила во парламентот.

Во овој материјал фали и реакцијата од СДСМ, која влијае на вистинитоста на текстот:

„Прво, премиерот Никола Груевски во првиот дел од денешната седница доцнеше 55 минути, а во вториот дел од седницата 40 минути, или вкупно 95 минути. Реакција за ова доцнење на премиерот од страна на Трајко Вељановски немаше. Второ, пријавените пратеници на ВМРО-ДПМНЕ, Александар Николоски и Влатко Ѓорчев, како и пратеникот Амди Бајрам, мистериозно исчезнаа од седницата. Трето, врв на тоа сценарио беше одлуката на Трајко Вељаноски, за десет секунди да ги прочита пратениците кои требаше да поставуваат пратенички прашања, и набрзина да ја затвори седницата, без да ги причека пратениците да влезат во салата“,

а која  што ја пренесоа некои од медиумите, меѓу кои споменатата телевизија со национална концесија и  еден портал.

 Извори на информации: Веста нема прецизни извори на информации, ниту, пак, посочува соговорници. Целиот напис се базира, на раскажувањето на „сведоци на настанот“, при што се користи формулацијата:  

„како што велат некои од присутните очевидци“

Содржајност: Се работи за куса преземена вест од друг портал, која ја има само едната страна на „паричката“ и прикрива информации.  Што пак, е во спротивност со амандманот 1 од  Кодексот на новинари:

 „Новинарот треба да објавува точни, проверени информации и нема да прикрива суштински податоци.“

Пристрасност: Според интонацијата и начинот на кој е обработена и пласирана веста, вклучително и насловот, може да се препознае  наклонетост кон владејачјата партија.

 Коментирање: Целата приказна е „зачинета“ со коментаторски елементи со кои се нагласува лошото поведение на опозиционерите. Во таа функција се констатациите од типот: „ама некому очигледно поважни му беа гастрономските (прашања)“, „изгледа им „легнаа“ мезето и пијалокот“, како и коментарот на крајот од веста:

„А што да се прави, кога таков им е опозицискиот табиет. Секогаш кога ќе ја опрскаш, набеди го својот потчинет. Така полесно се поднесува сопствениот пропуст

Оригиналност/Плагијат: Текстот е целосно  преземен од друг портал  без да се наведе линкот. Но,  таму е објавен во рубриката „радио Милева“, каде се пласираат полефтерни содржини. Текстот што го рецензираме, пак, порталот го објавил во рубриката Политика, што, сепак, подрабира посериозен пристап при третирањето на темите. Написот истиот ден беше објавен во идентична форма на уште еден сајт.

Квалитет на насловот: Насловот е провокативен, тој ја отсликува главната поента на приказната што им се сервира на читателите.

Фотографија: Како илустрација е искористена фортографија од собраниска седница за пратенички прашања, но на неа се присутни сите опозиционери, така што не одговара со содржината на материјалот што е пласиран.

Говор на омраза: Со нагласувањето дека пратениците од СДСМ се „љубители на кафеанскиот живот и добрата чашка“ се покажува јасна тенденција за дискредитација на опозицијата.

Заклучок: Сајтот на читателот му понудил наменски текст, обидувајќи се да го насочи јавното мислење да верува дека СДСМ е неодговорна партија, а нејзините пратеници се неработливи и не се однесуваат соодветно на нивото на пратеничката функција.  Со насловот и со непотврдените обвинувања се добива еден фабрикуван новинарски производ наменет да го наруши угледот на опозицијата.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар