АНАЛИЗА: Извршителите од граѓаните наплатиле 40,5 милиони евра за една година

Највисоки износи на долгови присилно се наплатени од фирмите, потоа од граѓаните, а на трето место е државата. Во исто време, компаниите биле и први на листата доверители кои успеале да наплатат највисок износ на побарувања од должниците, пишува Порталб.мк. Најновиот Извештај за работата на извршителите покажува дека во 2022 година е наплатен рекорден износ на долг, повисок од 144 милиони евра, а само од граѓаните износ над 40 милиони евра

Фирмите – први во должничкиот „круг” – тие се најголеми должници и доверители

Сумата што извршителите присилно ја наплатуваат се зголемува на годишно ниво. Минатата година, според Годишниот извештај за работата на Комората на извршители, бил наплатен рекорден износ на долг од фирми, граѓани и од државата во вкупен износ од 144,3 милиони евра. Ова е највисока наплатена сума на долг од 2006 година, кога започна присилната наплата на долгови преку извршителите. Само во однос на 2021, наплатениот долг е повисок за 14,3 милиони евра.

Минатата година биле доставени и рекордни 152.079 барања за извршување, но иако присилно наплатениот износ е рекордно највисок, интересно е дека степенот на реализација на примените барања изнесува 38,27 отсто и тој е најнизок во последните години, што е показател дека се работи за барања за присилна наплата на високи износи. Највисока сума на долг е наплатена од фирмите, износ од 81,7 милиони евра, потоа од граѓаните 40,5 милиони евра, а на трето место е државата од која е наплатен долг во висина од скоро 23,5 милиони евра.

Во 2022 во споредба со 2021 година, наплатениот долг од граѓаните е зголемен за скоро 3,6 милиони евра, од фирмите за 7,7 милиони евра, а од државата присилно се наплатени 3,3 милиони евра повеќе во 2022 година.

Од друга страна, според структурата на доверителите, највисок износ од 116,6 милиони евра се „слеале” во стопанството, на второ место се граѓаните во чие име извршителите наплатиле 22,6 милиони евра, а на трето е државата која преку извршителите присилно наплатила скоро 6,5 милиони евра.

Според податоците од Годишниот извештај за работата на извршителите, анализирано по подрачја, најголем број на барања за извршување, или 64.305, имало во Основниот суд, Граѓанскиот суд и Основен кривичен суд – Скопје, следуваат основните судови Куманово, Крива Паланка и Кратово, вкупно 13.943, потоа во подрачјето што ги опфаќа основните судови во Велес, Гевгелија, Кавадарци и Неготино со вкупно 13.466 поднесени барања и на трето место со 12.284 примени барања се основните судови во Гостивар и Кичево. Најмногу реализирани барања за извршување од примените во 2022 година, или 15,7 отсто, имало на подрачјето на Основниот суд Битола и Основниот суд Ресен, додека пак, подрачјето на Основните судови Куманово, Крива Паланка и Кратово имаат најмал процент на реализација на примени барања за извршување во 2022 година, односно 5,37 отсто.

Минатата година во земјава функционирале 92 извршители во 11 подрачја на основните судови во земјава. Единаесет извршители ставиле „клуч” на врата, најголем дел по лично барање, четворица поради пензионирање, а една извршителка поради разрешување. Во истата анализирана година именувани се шест нови извршители.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар