Индекс на отвореност на локалната самоуправа: Најотворена општина е Битола, најзатворена – Сопиште
„Она што е важно е да се обезбеди видлив пристап до услугите, заедно со контакти кои ќе им бидат од помош на граѓаните, за да можат да се информираат за тоа, каде да добијат помош при користење на некоја услуга. Канцеларии за контакт со граѓаните се исто така битна алатка, како и електронски алатки, информатор, социјални медиуми“, истакна Мила Јосифовска Даниловска, програмска менаџерка во Метаморфозис
Во С. Македонија, најотворена општина е Битола, а најзатворена е Сопиште. Разликата меѓу овие две општини е сериозна и изнесува цели 60 отсто. Тоа не би требало да биде така, бидејќи секоја општина подеднакво ги има истите одговорности кон своите граѓани и секој граѓанин има право на пристап до информации и услуги. Ова го покажуваат последните резултати од Индексот на отвореност на локалната самоуправа за 2024 година, кои беа презентирани денеска во Граѓанскиот ресурсен центар, во организација на Фондацијата Метаморфозис, Рурална Коалиција и Центар за социјални иновации Блинк 42-21.
На тематскиот форум „Вклучена заедница за отпорност на корупција“, во полната сала беа дискутирани добрите практики и предизвиците за потранспарентна локална самоуправа, со цел зголемување на довербата на граѓаните и искоренување на корупцијата.
Поздравни обраќања на настанот имаа Александар Кржаловски, национален тим лидер на Програмата Цивика мобилитас и директор на Македонскиот центар за меѓународна соработка, како и Бардил Јашари, извршниот директор на Фондацијата Метаморфозис. Резултатите од Индексот на отвореност на локалната самоуправа, ги презентираше Мила Јосифовска Даниловска, програмска менаџерка во Фондација за интернет и општество Метаморфозис, а на темата говореа и Лилјана Јоноски, директорката на Рурална Коалиција и Тони Коњановски градоначалникот на општина Битола.
„Анализата покажа дека најотворени општини се Битола со 67 отсто, Делчево со 66, Демир Хисар со 64, Велес со 60, Валандово со 59 отсто, додека, пак, најзатворени општини Сопиште, Студеничани, Кривогаштани, Росоман, Шуто Оризари. Ако се стават една до друга најтворената и најзатворената општина, ќе се види дека постои сериозна разлика од 60 отсто. Не би требало да биде така, бидејќи секоја општина ги има истите одговорности кон граѓаните, секој од нив има право на пристап до информации и услуги, кои влијаат на нивните животи“, кажа Мила Јосифовска Даниловска.
Отвореноста на општините се мери преку четири параметри: транспарентност, свесност, пристпност и интегритет. Оттука, најтранспарентни општини според Индексот на отвореност за 2024 се Берово, Велес, Валандово, Делчево, Битола, а најнетранспарентна е општината Сопиште. Гледано преку начелото свесност, кое се однесува на квалитетот на планирање, програмирањето, мониторингот и евалуацијата на локалните политики, најсвесна општина е Гевгелија. Дури 20 општини не објавуваат ниедна информација која се идентификува со областа „свесност“.
„Она што е важно е да се обезбеди видлив пристап до услугите, заедно со контакти кои ќе им бидат од помош на граѓаните, за да можат да се информираат за тоа, каде да добијат помош при користење на некоја услуга. Канцеларии за контакт со граѓаните се исто така битна алатка, како и електронски алатки, информатор, официјални профили на социјални медиуми на општината“, додаде Јосифовска Даниловска.
Директорот на Метаморфозис, која годинава одбележува 20 години постоење, Бардил Јашари, истакна дека промоцијата на дигитализацијата и ставањето во функција на подобрување на квалитетот на живеење на граѓаните, се централна точка и фокус на сите активности на организација.
„Во овие 20 години, работевме на градење капацитети на државните институции и на организациите, работевме многу анализи на е-услугите што ги има во нашата земја. Често се занемаруваат потребите на граѓаните, па токму затоа мораме придобивките од дигиталната трансформација да ги направиме опипливи. Дигитализацијата придонесува да се намали корупцијата, но таа не е цел сама за себе, туку е дел од друга визија и таа може значително да помогне“, истакна директорот Јашари.
Градоначалникот на општината Битола, за која анализата покажа дека е најотворена, Тони Коњановски, истакна дека независно од високите политики, сепак, она што ги допира граѓаните е токму локалната самоуправа.
„Тоа што сме најотворена општина, е поттик за нас да бидеме уште подобри. Многу сериозно ќе ја проучиме анализата која ја презентиравте за да се подобриме. Имаме обврска да направиме транспаретна и отчетна локална самоуправа. Чест и гордост е да се работи за локалната самоуправа, да се биде отворен, достапен за граѓаните. Преку мене и мојот лик тие ја гледаат транспарентноста, достапноста“, кажа Коњановски, кој истакна дека соработката со граѓанските организации е суштинска за адресирање на потребите на граѓаните.
За дигитална трансформација на локално ниво, како и за дигиталната алатка мЗаедница, зборуваа Милан Танчески, директор на Центарот за социјални иновации Блинк 42-21, како и Драган Ананиев, секретар на општина Кочани.
Форумот имаше за цел да поттикне акција против корупцијата, обединувајќи претставници од локалната самоуправа, граѓански организации, активисти, експерти, граѓани и медиуми во заедничка борба заснована на инклузивност и соработка.
Тематскиот форум „Вклучена заедница за отпорност на корупција“ беше организиран во рамки на проектот „Дигитална трансформација на локално ниво (ДИГИЛОК) – Вклучена заедница за отпорност на корупција“, финансиран од Владата на Швајцарија преку Цивика мобилитас.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
