Meта факт: Владата само делумно ја оствари финансиската помош за родителите со ниски примања

Експремиерот Димитар Ковачевски, во јавно обраќање од собраниската говорница, во декември минатата година најави дека повеќе од 105.000 ученици во основното образование и во средното образование, во наредните 6 месеци ќе добиваат по 1.200 денари, односно 1.800 денари, секој месец.

Но, дел од родителите со ниски месечни примања, односно со примања кои не надминуваат 50.000 денари, иако уредно и навреме поднеле документи уште кога мерката беше најавена, сепак, не ги добиваат парите редовно секој месец на нивните сметки. Има и родители (не сите) кои добиле пари само за декември и јануари, но не и за месеците потоа. Со оглед на ваквата состојба, ова ветување на експремиерот го оценуваме како делумно исполнето. 

Презентирајќи го деветиот сет мерки во декември лани, кој вклучува и финансиска помош за ученици, Ковачевски кажа:

„Hад 105.000 ученици во основното образование и средношколци, во наредните 6 месеци ќе добиваат по 1.200 денари, односно 1.800 денари месечно. Јас реков, никој нема да биде оставен сам и до денес се придржувам на тоа што го кажав од првиот ден од преземањето на позицијата претседател на Владата“.

Мета.мк во неколку наврати прашуваше во Фејсбук групи во кои членуваат родители, дали ги добиле парите како финансиска помош за нивните деца. Мнозинството одговори кои ги добивме беа дека тие не ги добиле парите ниту за декември, ниту пак за јануари и февруари.

„Во средината на јануари имаше една исплата за месец декември и тоа е сè“, гласи еден од коментарите.

Прашавме и во Министерството за образовние и наука, институцијата преку која се одвива целиот процес, зошто се доцни со исплатата на овие пари кои требаше да исплаќаат на месечно ниво. Иако парите не се исплатени за изминатите месеци, МОН неодамна го објави и четвртиот јавен повик за финансиска поддршка на основци и средношколци од семејства чии приходи во месецот не надминуваат 50.000 денари.

„Се соочуваме со предизвик – често во училиштата, родителите доставуваат неточни податоци, односно доставуваат трансакциски сметки кои се погрешни или затворени. Тоа ја закочува исплатата“, тврдат оттаму.

Мета, дополнително на 27 март, постави неколку прашања до МОН на ова тема. Колку досега вкупно пари се исплатени на ученици од семејства со ниски примања? Колку родители аплицирале (поднеле документи) за користење на оваа мерка? За колку месеци и за кои месеци досега се исплатени пари?

На овие прашања не добивме официјални одговори, а неофицијално ни беше објаснето дека е тешко да се одговорат прашањата со оглед на тоа дека се менуваат бројките на ученици и сумата која се издвојува за оваа намена.

Инаку, оваа мерка е предвидено да ја искористат околу 75 илјади основци и 30 илјади средношколци. Аплицирањето се вршеше преку училиштата, а исплатата требаше да биде етапна, односно како што училиштата доставуваат податоци до МОН, така да се подготвуваат налози за плаќање. Иако доцнењата на исплатите се големи, во буџетот на МОН за антикризните мерки од деветиот пакет на Владата, беше кажано дека се обезбедени 843 милиони денари наменети за ученици и студенти. Предвидено беше, почнувајќи од декември лани па сè до мај годинава, родителите со ниски примања секој месец на сметка да добиваат по 20 евра.

Со оглед на тоа дека има голем број родители кои не добиваат финансиска помош секој месец како што беше ветено, но сепак, и со оглед на тоа дека има родители кои добија пари за декември и јануари, ова ветување можеме да заклучиме дека е делумно исполнето. 

ИЗВОРИ:

Влада на РСМ, 01.12.2023 – Ковачевски: Од денеска стартува и новиот 9-ти сет мерки – финансиска поддршка за ученици, студенти, пензионери, ранливи категории граѓани, земјоделци, компании – никој не е оставен сам!

Одговори на поставени прашања од Министерството за образование и наука (МОН), 16.02.2024

Анкета во Фејсбук група „Поддршка за онлајн настава“, 11.03.2024

(Мета.мк)