Со сензационалистички наслов се дезинформира за ковид пандемијата
Драматична фотографија, бомбастичен наслов и лоша содржина се основните елементи на дезинформацијата што ја рецензираме. Сензационалистичкиот наслов кај читателот остава впечаток дека содржината ќе го информира за нов ковид бран или можеби за нова епидемија. Меѓутоа, насловот и содржината немаат никаква логична врска.
Изненадуваат кинеските научници, подгответе се затоа што повторно може да имаме… е насловот на текстот објавен на порталот „Газета Банер“. Овој наслов е ,,поткрепен” со драматична слика која заедно со насловот кај читателот остава впечаток дека содржината ќе го информира со интересни вести за пандемијата. Сепак, содржината што ја рецензираме не само што нема конкретни информации, туку и лажните тврдења кои се презентирани во неа за читателот се многу нејасни и збунувачки.
Во првиот дел се тврди дека Пекинг превзема рестриктивни мерки против ковид 19 во пресрет на почетокот на Олимписките Игри во 2022 година. Во продолжение се тврди дека „властите кои применуваат политика на помала толеранција презеле големи чекори за отстранување на епидемијата, која во моментот е многу ограничена, со помалку од 300 случаи“. Реченицата која е формулирана на многу нејасен начин го збунува читателот, кој не знае дали се работи за нова епидемија или нов бран на КОВИД-19?
Тврдењата изнесени во содржината не се засноваат на изјави на ниту еден кинески, или каков и да е експерт, и не се цитира ниту еден официјален извор.
Што се случува во Кина?
Кина, земјата каде пред две години за прв пат беше откриен Ковид-19, е решена да го елиминира вирусот на својата територија. Кина продолжува да спроведува строги рестриктивни мерки за да ја задржи ситуацијата под контрола.
И покрај целосната вакцинација на повеќе од 75 проценти од нејзиното население, Кина се придржува до својата строга стратегија „нулта-Ковид“, што значи дека во Кина границите се сè уште затворени, има задолжителен карантин за сите влезови, меѓународни и локални блокади во границите на Кинеската држава во случај на идентификување на нов случај, известува Си-Ен-Ен.
На почетокот на ноември, северозападниот град Ланжу, населен од повеќе од 4 милиони луѓе, беше ставен во целосен карантин само затоа што беа пријавени шест нови случаи на Ковид-19. Иако некои кинески здравствени власти предложија олабавување на мерките откако стапката на вакцинација ќе достигне на 85 проценти, аналитичарите велат дека во следните 12 месеци повеќето од ограничувањата најверојатно нема да бидат олабавени.
Пред неколку дена, Националната Здравствена Комисија во Кина извести за 48 нови случаи на коронавирус, со што бројот на позитивни случаи достигна над 300 луѓе во 14 различни провинции. Во многу делови од светот, овие бројки не би биле воопшто загрижувачки, можеби би се сметале за позитивна вест, но, не и во Кина, која е цврсто посветена на целосната елиминација на вирусот.
Официјалните статистички податоци покажуваат дека во провинцијата на Пекинг во рок од 2 недели имало 27 нови случаи на КОВИД-19. Кинеската престолнина има над 21 милион жители и моментално има само 1.177 активни случаи на КОВИД-19.
Вистина е дека кинескиот главен град ќе биде домаќин на Олимписките Игри 2022, но до сега ниту еден кинески експерт не не изненадил со некоја неочекувана вест. На официјалната веб-страница на Олимписките Игри во 2022 година на 100 дена пред почетокот на зимските натпревари нема информации дека Пекинг се соочува со влошување на епидемијата.
За да се осигураат дека Олимпијадата нема да предизвика нов бран на пандемијата кај локалното население, кинеските организатори имаат своја стратегија. Си-Ен-Ен известува дека публиката на Олимписките Игри во 2022 година ќе ја сочинуваат само жителите на континентална Кина. На своите жители Кина нема да им дозволи контакт со странските спортисти кои ќе дојдат во Кина за да учествуваат на Олимписките Игри. За да ги заштитат своите граѓани, кинеските власти ја создадоа стратегијата „ Covid-safe bubble (Меур безбеден од КОВИД) “, со што ќе се избегнат контактите меѓу спортистите кои учествуваат на натпреварите и локалното население.
Сепак, организацијата на Олимписките Игри во Пекинг за 2022 година се одвива со многу контроверзии и обвинувања против Кина.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар