Зелената агенда е патоказ за унапредување на квалитетот на животот
Зелената агенда на Светскиот економски форум воопшто не значи дека нема да има сонце, растенија, храна и луѓе како што невистинито се тврди во објавата што ја рецензираме. Зелената агенда се однесува на глобални проблеми за кои е потребна итна акција. Зелената агенда за Западен Балкан се состои од 5 столба: 1) Декарбонизација: климатска акција, зелена енергија и одржлив транспорт 2) Циркуларна економија 3) Борба против загадувањето 4) Одржливо производство на храна и одржливи рурални средини 5) Биодиверзитет: Заштита и реставрација на природата и екосистемите
Зелената агенда на Светскиот економски форум воопшто не значи дека нема да има сонце, растенија, храна и луѓе, како што невистинито се тврди во објавата што ја рецензираме. Зелената агенда се однесува на глобални проблеми за кои е потребна итна акција. Зелената агенда за Западен Балкан се состои од 5 столба: 1) Декарбонизација: климатска акција, зелена енергија и одржлив транспорт 2) Циркуларна економија 3) Борба против загадувањето 4) Одржливо производство на храна и одржливи рурални средини 5) Биодиверзитет: Заштита и реставрација на природата и екосистемите
Рецензираме објава на социјалната мрежа Фејсбук во која се споделува фотографија од Бил Гејтс и пишува:
„Зелената Агенда” на светскиот економски форум. Нема Сонце, Нема растенија, Нема храна, Нема луѓе.
За време на ковид пандемијата, падот на глобалната побарувачка за енергија резултираше со помали емисии на јаглерод диоксид. Овој тренд стана поизразен поради падот на субвенциите за фосилни горива и зголемувањето на производството на електрична енергија од обновливи извори и продажбата на електрични возила. Луѓето ширум светот забележаа позитивни ефекти, воздухот беше помалку загаден, а природата се подобруваше. Изгледаше како да има можност за економско закрепнување во кое зелените политики ќе поддржат одржлив економски раст, со позитивно влијание врз здравјето и благосостојбата.
Иако се чинеше дека може да се постигне забавување на емисиите на стакленички гасови и дека може да се опорави животната средина, се случи воената инвазија на Русија врз Украина која го поларизираше светот, предизвика енергетски и прехранбени кризи и ја поттикна глобалната инфлација и порастот на трошоците за живот. Тоа го стави прашањето за енергетската безбедност на врвот на политичката агенда на сметка на енергетската транзиција.
Зелената агенда за Западен Балкан е инструмент за постигнување на Европскиот зелен договор во нашиот регион. Европскиот зелен договор претставува пресвртница во борбата против климатските промени и сеопфатна стратегија за раст на Унијата, а неговата имплементација треба да доведе до климатска неутралност на Европската унија до 2050 година.
Со потпишување на софиската декларација за зелената агенда за Западен Балкан на 10-ти ноември 2020 година, земјите од регионот се обврзаа да ја имплементираат Зелената агенда како „патна карта“ за низа конкретни акции и мерки што ќе доведат до развој со минимално испуштање на јаглерод и економски раст во согласност со принципите на одржлив развој. Зелената агенда за Западен Балкан опфаќа пет области: клима, енергија и мобилност; циркуларна економија; спречување на загадувањето; одржливо земјоделство и производство на храна и биодиверзитетот. За да ја разбереме Зелената агенда за Западен Балкан, треба да го разбереме Европскиот зелен договор. Тој е долгорочна развојна стратегија на земјите од ЕУ, која има за цел да ги спречи климатските промени. Последиците од климатските промени во природата денес веќе можеме да ги видиме, од топењето на глечерите, брзиот пораст на нивото на морето, до интензивните топлотни бранови, појавата на нови болести и масовното исчезнување на различни растителни и животински видови. Главниот виновник за овие нуспојави кои влијаат на нашата околина е емисијата на стакленички гасови, поточно оние кои како покривка ја задржуваат топлината во атмосферата на Земјата и на тој начин ја загреваат планетата. Затоа, главната цел на Зелениот договор е да се постигне јаглеродна неутралност до 2050 година, односно целосно да се неутрализира количината на стакленички гасови што ги испуштаме во атмосферата, пишува Обединет Балкан за чист воздух.
Како дел од зелената агенда потребно е земјите од нашиот регион заеднички да развијат стратешки планови за заштита на природата и биодиверзитетот и заеднички да ги имплементираат. Треба да направиме и заеднички планови за обновување на шумските површини, како и за спречување на уништувањето на шумите, што во моментов е голем проблем во некои од земјите од Западен Балкан. Со цел понатамошно подобрување на зачувувањето на биолошката разновидност и екосистемите, Зелената агенда ќе ја поттикне соработката меѓу нашите земји, особено помеѓу институциите кои се занимаваат со заштита на природата и истражување, со цел да се формира заеднички информативен центар за биолошка разновидност на Западен Балкан. Целта на оваа соработка, како и целта на формирањето на заеднички информативен центар, е да се истражат можностите и начините за зачувување на биолошката разновидност, како и можностите за развој на природни решенија за одбрана од ефектите на климатските промени, пишува Обединет Балкан за чист воздух, објаснувајќи ја зелената агенда.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар