Не е вистина дека покачената температура значи дека сте отруени

Знаците на труење со некој отров се многубројни и никако не може да се тврди дека доколку имате само покачена температурата, автоматски значи дека сте отруени. Всушност, покачената телесна температура воопшто не е наведена како дел од симптомите на труење

 

Фејсбук објавата што е предмет на оваа рецензија, тврди дека единствена причина за покачена телесна температура кај луѓето е присуство некаков отров. Притоа, се тврди дека докторите лажат и дека болестите се пазар за големи пари. Ова е неточна информација која може да предизвика голема штета.

Ако качите темп.и ве боли цела снага,отруени сте.

Вашите доктори ве лажат,медиуми и влада .

Дебели пари се во прашање.

Вие сте само пазар, се вели во постот.

Секој човек бар еднаш во животот имал покачена температура. Причините за ваквата реакција на телото се многубројни, но најчесто се случува како резултат на заразување со вирус или поради бактериска инфекција. Од друга страна, пак, труењето се случува поради голтање, вдишување, допирање или инјектирање разни лекови, хемикалии, отрови или гасови

Знаците на труење со некој отров се многубројни и никако не може да се тврди дека доколку имате само покачена температурата автоматски значи дека сте отруени. Всушност, покачената телесна температура воопшто не е наведена како дел од симптомите на труење.

Покачена телесна температура обично исчезнува во рок од неколку дена. Голем број на лекови без рецепт ја намалуваат треската, но понекогаш е подобро да не се лекува. Треската игра клучна улога во помагањето на вашето тело да се избори со голем број заразни заболувања како составен дел од имунолошката одбранбена оска.

За возрасен, треската може да биде непријатна, но обично не е причина за загриженост освен ако не достигне (39,4 C) или повисока. За доенчиња и мали деца, малку покачена температура може да укаже на сериозна инфекција.

Треска се јавува кога област во вашиот мозок наречена хипоталамус позната и како „термостат“ на нашето тело – ја поместува поставената точка на нормална телесна температура нагоре. Кога тоа ќе се случи, може да чувствувате дека ви е ладно и да додадете слоеви облека или да се завиткате во ќебе, или може да се тресете за да создадете повеќе телесна топлина, што на крајот ќе резултира со покачена телесна температура.

Нормалната телесна температура варира во текот на денот – пониска е наутро и повисока доцна попладне и навечер. Иако 37 C се смета за нормална, температурата на вашето тело може да варира за еден степен или повеќе – од околу (36,1 C) до (37,2 C) – и сепак да се смета за нормална, пишува на веб-страницата на клиниката Мајо (САД).

Доктор Александра Георгиева, претседателка на Здружението на лекари специјализанти во изјава за „Вистиномер“ вели дека покачената телесна температура, претставува нормална, природна реакција на организмот на различни состојби, најчесто резултат на некаква инфекција, а дека симптомите на труење се многубројни.

Според неа, вакви изјави кои тврдат дека лекарите ги лажат своите пациенти се неосновани и лесно можат да бидат побиени преку соодветни тестови кои ќе докажат дали дадено лице било затруено со одредена супстанца.

Симптомите на труење зависат од супстанцата и количината што е внесена во организмот. Некои отровни материи, како што е јаглерод моноксид, ја попречуваат способноста на крвта да носи кислород. Други, како што е белилото, го горат и иритираат дигестивниот систем. Симптомите на труење имаат голем диверзитет, но најчесто се презентираат со тахикардија, болка во стомакот, повраќање, абнормална пребоеност на кожата и слузницата, екцесивно создавање на плунка, потешкотии во дишењето и голтањето и така натаму. Тоа е што е заедничко за сите типови на труења е дека токсичната супстанца може да се докаже преку соодветен токсиколошки тест, вели Георгиева.

Со гледање на пошироката слика и земајќи ги предвид сите факти, никако не може да се изведе заклучок дека покачената температура е резултат на труење. Вакви фабрикувани објави од една страна предизвикуваат паника помеѓу населението, а од друга страна го поткопуваат авторитетот на лекарската фела и сериозно може да му наштетат на јавното здравје

Доколку имате покачена телесна температура, консултирајте се со вашиот доктор кој ќе ја открие причината за таа состојба и потоа соодветно ќе ја третира доколку има потреба. Не верувајте на вакви објави кои можат да ви го загрозат здравјето и да предизвикаат сериозни последици.

 

 

 

 

 

 

 

---

Овој напис е изработен во рамките на Проектот за брзо справување со вакциналните дезинформации, имплементиран од Фондацијата Метаморфозис. Тој е првично објавен во Вистиномер, а e овозможен со поддршка на Балканскиот фонд за демократија, проект на Германскиот Маршалов фонд на САД (BTD – The Balkan Trust for Democracy, a project of the German Marshall Fund of the United States). Содржината на написот е одговорност на авторот и не секогаш ги одразува ставовите на Метаморфозис, БТД или нивните партнери.

---

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар