Студија на Лансет не покажува дека на вакцинираните им слабее генералниот имунитет

Рецензираме пост објавен на социјалната мрежа Фејсбук во кој се споделува напис со наслов:

Предупредување до вакцинираните, студија на реномираниот Лансет покажува слабеење на имунитетот кај вакцинираните лица по неколку месеци.

Во текстот се вели дека студија на Лансет се бавела со ефективноста на вакцината за ковид-19 и падот на имунитетот на вакцинираните со текот на времето.  

Се вели дека шест месеци после втората доза, а особено 8 месеци после втората доза, кај некои ранливи поединци, вакцините имале мала, па дури и негативна ефикасност, а најалармантни биле бројките кај лицата постари од 80 години или кај тие со коморбидитети.

Вистиномер ја пронајде студијата и таа не го прикажува изнесеното во насловот споделен во постот што го рецензираме. Имено, ваквиот наслов  укажува дека на вакцинираните ќе им опадне општиот имунитет односно заштитата на нивното тело против болести и тоа неколку месеци по вакцинацијата.

Тоа не е точно.

Студијата ги испитува ризиците од тоа некој што е вакциниран да се зарази со ковид, да биде хоспитализиран и да почине до 9 месеци после втората доза на ковид вакцината. Во оваа студија како што може да се види, се известува дека вакциналната ефективност се намалува со текот на времето, што значи дека заштитата што ја нуди вакцината не е перманентна!

Во студијата се вели дека баш затоа треба да се администрира трета вакцина односно бустер, и тоа кај ранливите групи во повисок ризик од сериозни последици од ковид-19, заради тоа што кај тие луѓе побрзо избледува вакциналниот имунитет.

Значи, наспроти она што се изнесува во насловот, поради вакцината нема да му опадне генералниот имунитет на кој било човек. Студијата на Лансет се однесува на тоа дека вакциналната заштита е најголема во одреден временски период, конкретно веднаш откако ќе се прими втората доза од вакцината, ама со текот на месеците таа заштита на вакцината опаѓа. Во насловот, пак, се вели дека имунитетот на вакцинираните им се намалува,  нотоа не е вистина, вакцината нема негативни последици на имунитетот на оние коишто ја примиле.

Во студијата пишува дека избледувањето на заштитата што ја нуди вакцината е поголемо кај луѓе што припаѓаат на клинички поранлива група и кај повозрасни лица.

Разумно објаснување за ова намалување на ефективноста (како што се вели во студијата) претежно кај постари возрасни, би било дека адаптивниот имун одговор управуван од Б клетките, како и Т клетките се онеспособени на постара возраст.

Понатаму во студијата се вели дека индивидуите кои примиле трета доза имале намалена стапка на инфекции и хоспитализација, споредено со оние кои примиле две дози вакцина.

И Хелт Фидбек, наведува дека студијата е погрешно интерпретирана ширум светот, исто како што е случај и во постот што го рецензираме. Студијата не покажува слабеење на имунитетот кај вакцинираните по неколку месеци, туку слабеење на заштитата што ја нуди вакцината против ковид-19 по неколку месеци. Тоа се две различни работи.

Вака како што е напишан насловот на текстот, како и самиот пост, сугерира дека вакцинираните после неколку месеци ќе имаат ослабен имунитет, што не е ниту предмет ниту заклучок од Студијата.

Поради сите горенаведени факти оценуваме дека во овој пост е пропуштен контекстот.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар