ЕУ нема објавено дека „вакцините против ковид биле незаконски одобрени“

Вакцините се одобруваат во ЕУ со строги критериуми. Досега во ЕУ, според информациите објавени од Европската комисија, се доставени 1.5 милијарди дози вакцини против ковид-19, а 82.5 проценти од возрасната популација во ЕУ е целосно вакцинирана. Дополнително, на 1 септември 2023 година Европската комисија одобри адаптирана вакцина против ковид-19 за есенските кампањи за вакцинација на земјите членки

 

Рецензираме објава на социјалната мрежа Фејсбук во која пишува:

18.10.2023

ЕУ објави дека вакцините „против ковид“ биле незаконски одобрени.

Станува збор за невистинита информација. ЕУ нема објавено дека вакцините против ковид биле „незаконски одобрени“.

На веб-страницата на Европската комисија e објавено дека по позитивна проценка на Европската агенција за лекови ЕМА, во врска со безбедноста, квалитетот и ефикасноста, Комисијата има дадено условна авторизација за 8 вакцини против ковид-19 произведени од Фајзер и Бионтек (одобрена на 21 декември 2020), Модерна (одобрена на 6 јануари 2021), Астра Зенека (одобрена на 29 јануари 2021), Јансен (одобрена на 11 март 2021), Новавакс (одобрена на 20 декември 2021), Валнева (одобрена на 24 јуни 2022), Санофи (одобрена на 11 ноември 2022) и Хипра (одобрена на 30 март 2023).

Покрај одобрените вакцини Европската агенција за лекови ги разгледува и вакцините „Спутник“ од Гамалеја институт, како и Веро Сел од Синовак. Нивното разгледување ќе продолжи додека да сè соберат доволно докази за формална авторизација.

Вакцините се одобруваат во ЕУ со строги критериуми.

Секоја фирма која создава вакцини и сака да стави вакцина на пазарот на ЕУ, прво треба да добие авторизација од ЕУ за вакцината. Барањето се поднесува до Агенцијата за лекови ЕМА, која ги оценува безбедноста, ефикасноста и квалитетот на вакцината. Ако ЕМА даде позитивна препорака, Комисијата продолжува со авторизација на вакцината на европскиот пазар.

Како одговор на заканата каква што е пандемијата, ЕУ има специфична регулаторна алатка за да овозможи рана достапност на медикаментите при итни состојби. Во такви итни состојби, се спроведува процедура за условна авторизација за да се добие дозвола што побрзо, веднаш штом доволно податоци станат достапни. Оваа алатка ѝ дава на ЕУ широка рамка за забрзано одобрение, пишува на сајтот на Европската комисија.

Во своето одлучување ЕМА презема сериозна, темелна и голема анализа на сите докази доставени од производителот на вакцината.

Процесот се состои од неколку проверки и се базира на систем на рецензии од многу инволвирани експерти, вклучително и Комитетот за фармаковигиланца, Комитет за хумана медицина со членки од сите земји итн. Комитетот за хумана медицина ќе даде позитивна препорака амо кога доказите уверливо покажуваат дека бенефитите од вакцината се поголеми од нејзините ризици, наведува Европската комисија.

Како што е наведено на сајтот на ЕК, Европската комисија е законски одговорна за одобрението за ставање во промет. По позитивната препорака од Комитетот за лекови за човечка употреба на ЕМА, Комисијата ја потврдува исправноста на сите елементи што го поддржуваат одобрението за ставање во промет. Тие вклучуваат научни оправдувања, информации за производот, едукативен материјал за здравствените работници, етикети, обврски за производителот, услови за употреба и можни обврски за земјите членки.

Комисијата, исто така, е одговорна да ги обезбеди сите потребни информации и да им ги направи достапни на пациентите и на здравствените работници низ ЕУ на нивниот национален јазик. Со оглед на овие факти, евидентно е дека за одобрување на вакцината во ЕУ има процедура која е законска и одобрението е по строго контролирани протоколи низ кои поминале вакцини од 8 производители коишто во моментов се авторизирани во ЕУ.

Досега во ЕУ, според информациите објавени од Европската комисија доставени се 1.5 милијарди дози вакцини против ковид-19 и 82.5 проценти од возрасната популација во ЕУ е целосно вакцинирана.

Дополнително, на 1 септември 2023 Комисијата одобри адаптирана вакцина против ковид-19 за есенските кампањи за вакцинација на земјите членки.

Таа е одобрена за возрасни, деца и бебиња над 6 месеци.

На ваков начин, во согласност со стратегијата за вакцинација на ЕУ, Комисијата продолжува да осигурува дека земјите членки имаат пристап до најновите одобрени вакцини против ковид-19 во количини потребни за да ги заштитат ранливите категории од популацијата и да се справат со епидемиолошката еволуција на вирусот. Не само што ова одобрение е законско, туку е и проверено и ефикасно и важи во сите земји членки на ЕУ и ЕУ од него нема ретерирано.

Поради сите горенаведени факти, објавата што ја рецензираме ја оценуваме како невистинита.

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар