Полувистина: Груевски: ветеното во програмата, се исполнува
Претседателот на ВМРО-ДПМНЕ Никола Груевски заедно со неколку партиски функционери на 28.02.2016 година беа на средба со граѓаните од Чучер Сандево, Бразда, Чучер Сандево, Мирковци и Кучевиште. Груевски тогаш изјави:
Ми беше задоволство што можев директно од граѓаните да слушнам за овие проблеми. Интересно е тоа што сите бараат нивните барања да бидат внесени во програмата на ВМРО-ДПМНЕ од причина што знаат дека ако барањата ги ставиме во програмата, тогаш таа работа се исполнува. Задоволство ми е што дојдовме до тој степен луѓето да разберат дека кога нешто ќе влезе во програмата, тогаш тоа е речиси завршена работа, изјави Груевски
[Извор: Македонија24 (од 0,30 до 1,01 минута од видеото) Датум:28.02.2016, ]
ОБРАЗЛОЖЕНИЕ:
Вистиномер подолг период ги анализира програмите на политичките партии и ги оценува нивните изборни ветувања. Досега повеќе пати се анализирани ветувања од програмите на ВМРО-ДПМНЕ за различни изборни циклуси. Некои од овие ветувања се исполнети, некои се делумно исполнети, но дел од ветените проекти на оваа партија не се исполнети.
Еве неколку примери:
1.
Меѓу исполнетите ветувања од оваа партија, што беше оценувано од Вистиномер е телефонската линија за медицински совети (Ало докторе). Проектот „Ало докторе“почна со работа на 15. септември 2015 година.
2.
Делумно исполнето е ветувањето за Модернизација и електронска наплата на патарините.
На 08.01.2016 година со почеток на изградбата на новата електронска наплатна станица кај Романовце, стартуваше пороектот за модернизацијата на патарините.
Ветувањето е делумно исполнето затоа што е малку задоцнета реализацијата, која според изборните проекции требаше да заврши до крајот на 2015 година.
3. Изградба на нов клинички блок
Реновирање на хируршките клиники и интегрирање со новиот клинички блок; Поврзување на Гинекологија и акушерство и Онкологија и радиотерапија. (Рок 2014-2018. Буџет 70.000.000 милиони евра)
Клиничкиот центар – Скопје или префрлањето на најголемиот број на сегашните универзитетски клиники од Клиничкиот центар „мајка Тереза“ во нов објект , може да се прогласи метафорично за „клинички случај“ и станува збор за неисполнето ветување на владејачката партија ВМРО ДПМНЕ и на Владата, т.е. на Министерството за здравство. Се разбира, ако работите не ги гледаме од формален, туку од суштински аспект, т.е. не од ископаната и оставената огромна дупка со која формално уште на почетокот на 2014 година беа означени почетокот на градежните работи.
4.
Долго најавуваниот проект за воспоставување на ЦЕРТ-тим во Македонија (CERT –Computer Emergency Readiness Team) кој би работел на превентивни мерки при сајбер напади е предвиден во предизборната програма на ВМРО – ДПМНЕ 2014-2018 година со рок на реализација до 2015 година. Засега нема информација дека ова стручно тело е воспоставено, така што може да се заклучи дека изборното ветување „Управување со сајбер кризи-Cyber Crisis Management”, е неисполнето.
Имајќи го предвид сето ова може да се каже дека изјавата на претседателот на ВМРО-ДПМНЕ, Никола Груевски дека ветеното во програмата на ВМРО-ДПМНЕ се исполнува, е полувистина.
ЛИНКОВИ:
- Вистиномер ( 09.02.2016): Неисполнето: Не е воспоставен ЦЕРТ-тим за управување со сајбер напади [Пристапено на 01.03.2016]
- Вистиномер (19.02.2016): Неисполнето: Болницата во Штип ќе „почнеме да ја градиме од 2014 до 2018“ [Пристапено на 01.03.2016]
- Вистиномер (25.01.2016): ВМРО-ДПМНЕ: Телефонска линија за медицински совети (Ало докторе) [Пристапено на 01.03.2016]
- Вистиномер (09.01.2016): ВМРО-ДПМНЕ: Модернизација и електронска наплата на патарините [Пристапено на 01.03.2016]
Оценето од: Владе Ѓорчев
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
