Отворено писмо до извршниот директор на YouTube од проверувачите на факти низ светот

Не гледаме обид од страна на YouTube да имплементира политики во насока на решавање на проблемот со дезинформациите, се вели во отвореното писмо од над 80 организации за проверка на факти, меѓу кои и Вистиномер, упатено до ЈуТјуб. Напротив, YouTube дозволува платформата да биде искористена како оружје од страна на бескрупулозните чинители, за тие да манипулираат и искористуваат други, како и да се организираат и да собираат средства, стои понатаму во писмото, кое во текот на денешниот ден се објавува ширум светот

 

12 јануари 2022

Г-ѓа Сузан Војчицки,

Поминаа речиси две години од почетокот на ковид-19 пандемијата. Светот одново беше сведок на тоа колку дезинформациите можат да бидат деструктивни за социјалната хармонија, демократијата и јавното здравје. Уништени се многу животи, а преголем број луѓе ги загубија своите најблиски како резултат на дезинформациите. Како меѓународна мрежа на организации за проверка на факти, следиме како лагите се шират на интернет и секојдневно гледаме дека YouTube е еден од главните канали на онлајн дезинформации ширум светот. Ова е нешто што предизвикува значајна загриженост во нашата глобална заедница за проверка на факти.

Она што не го гледаме е обид од страна на YouTube да имплементира политики во насока на решавање на проблемот. Напротив, YouTube дозволува платформата да биде искористена како оружје од страна на бескрупулозните чинители за тие да манипулираат и искористуваат други, како и да се организираат и да собираат средства. Сегашните мерки се покажуваат како недоволни. Затоа, ве повикуваме да преземете ефикасна акција против дезинформациите и да креирате патоказ за интервенции врз политиките и производите со цел подобрување на информацискиот екосистем – а ова да го сторите во соработка со независните, непартиски, светски организации за проверка на факти.

Во последната година видовме заговорнички групи кои прекугранично напредуваат и соработуваат, вклучително и меѓународно движење кое започна во Германија, допатува до Шпанија и се прошири низ Латинска Америка, а сето тоа се случуваше на YouTube. Во меѓувреме, милиони други корисници гледаа видеа на грчки и арапски јазик што ги охрабруваа да ги бојкотираат вакцините или да го лекуваат ковид-19 со лажни лекови. Покрај ковид-19, постојат видеа на YouTube што со години промовираат лажни лекови за рак.

Во Бразил, платформата се користи за засилување на говорот на омраза против ранливите групи, достигнувајќи десетици илјади корисници. Не е безбеден ниту процесот на избори. На Филипините, лажните содржини со над 2 милиони прегледи, кои ги негираат кршењата на човековите права и корупцијата за време на годините на воена состојба, се користат за да го обелат образот и угледот на синот на починатиот диктатор, еден од кандидатите на изборите во 2022 година. Во Тајван, последните избори беа нарушени со неосновани обвинувања за измама. Целиот свет сведочеше на последиците од дезинформациите кога насилна толпа го нападна седиштето на Конгресот на САД минатата година. Во пресрет на претседателските избори во САД и ден потоа, видеата на YouTube кои го поддржуваа наративот за „измама“ беа прегледани повеќе од 33 милиони пати.

Примерите не можат да се добројат. Голем број од тие видеа и канали остануваат достапни и денес, а сите тие беа незабележани од политиките на YouTube, особено во земјите од неанглиско говорно подрачје и во земјите од глобалниот југ. Драго ни е што компанијата неодамна направи неколку чекори за да се обиде да го реши овој проблем, но врз основа на она што секојдневно го гледаме на платформата, сметаме дека овие обиди не функционираат. YouTube не креира квалитетни податоци за да ја докаже својата ефикасност.

Платформата на Вашата компанија досега ги оформуваше дискусиите за дезинформациите како лажна дихотомија на бришење или небришење содржини. Со тоа, YouTube ја избегнува можноста да го стори она што е докажано дека функционира: нашето искуство како проверувачи на факти и академските докази ни покажуваат дека објавувањето на проверени факти е поефективно од бришењето на содржини. Ова, исто така, ја зачувува слободата на изразување, притоа признавајќи ја потребата од дополнителни информации за да се ублажат ризиците од штети по животот, здравјето, безбедноста и демократските процеси. Со оглед на тоа што огромен дел од прегледите на YouTube доаѓаат од неговиот сопствен алгоритам за препораки, платформата, исто така, треба да се погрижи да не промовира дезинформации активно на своите корисници или да препорачува содржини кои доаѓаат од несигурни канали.

Имајќи го сето ова на ум, предлагаме неколку решенија кои би направиле голема разлика во намалувањето на ширењето дезинформации на YouTube.

1. Платформата да се поосвети на засилена транспарентност за дезинформациите што се наоѓаат на неа: YouTube треба да поддржи независно истражување за потеклото на различните кампањи за дезинформации, нивниот досег и влијание, како и за најефикасните начини за разоткривање на лажните информации. Исто така, треба во целост да ја објави својата политика за модерирање кога станува збор за дезинформациите, вклучително и употребатата на вештачка интелигенција и кои податоци ја хранат самата вештачка интелигенција.
2. Покрај отстранувањето на содржини заради законска усогласеност, фокусот на YouTube треба да биде на обезбедување контекст и понуда на проверени содржини, јасно наведени во видеата или како дополнителна видео содржина. Тоа може да се случи само преку значајна и структурирана соработка, преземајќи одговорност, како и систематско инвестирање во независните обиди за проверка на факти ширум светот кои работат на решавање на овие проблеми.
3. Преземање дејства против постојаните престапници кои произведуваат содржини кои постојано се оценуваат како дезинформации, особено оние кои ја монетизираат таа содржина на и надвор од платформата. Ова може да се постигне преку спречување на своите алгоритми за препораки да промовираат содржини од такви извори на дезинформации.
4. Проширување на сегашните и идните обиди против ширење дезинформации на други јазици, освен англиски и обезбедување податоци специфични за земјата и јазикот, како и услуги за транскрипција кои ќе функционираат на кој било јазик.

Се надеваме дека ќе размислите за можна имплементација на овие идеи за јавното добро и ќе го направите YouTube платформа која навистина дава сѐ од себе за да ги спречи дезинформациите да бидат употребувани како оружје против Вашите корисници и целото општество. Ние сме подготвени и можеме да му помогнеме на YouTube. Сакаме да се состанеме со вас за да разговараме за овие прашања, да најдеме начини за унапредување на соработката и со нетрпение го очекуваме вашиот одговор на оваа понуда.

 

---

Africa Check (Senegal, Nigeria, Kenya, South Africa) / Animal Político – El Sabueso (Mexico)  / Aos Fatos (Brazil) / Bolivia Verifica (Bolivia) / BOOM (India, Myanmar and Bangladesh) / Check Your Fact (USA) / Code for Africa – PesaCheck (Burkina Faso, Burundi, Cameroon, Central African Republic, Côte d’Ivoire, Ethiopia, Ghana, Guinea, Kenya, Mali, Niger, Nigeria Senegal, South Africa, Sudan, Tanzania, Uganda and Zimbabwe) / Colombiacheck (Colombia) / CORRECTIV (Germany) / Cotejo.info (Venezuela) / Chequeado (Argentina) / Delfi Lithuania (Lithuania) / Demagog Association (Poland) / Doğruluk Payı (Turkey) / Dubawa (Nigeria, Ghana, Sierra Leone, Liberia and The Gambia) / Ecuador Chequea (Ecuador) / Ellinika Hoaxes (Greece) / Fact Crescendo (India) / Fact-Check Ghana / FactCheck.org (USA) / FactSpace West Africa / Facta (Italy) / FactcheckNI (UK) / Factly (India) / Factual.ro (Romania) /FactWatch (Bangladesh) / Fakenews.pl (Poland) / Faktist.no (Norway) / Faktograf.hr (Croatia) / Faktoje (Albania) / Fast Check CL (Chile) / Fatabyyano (Middle East and North Africa) / Full Fact (UK) / GRASS – FactCheck Georgia / India Today Group (India) / Istinomer (Serbia) / Istinomjer (Bosnia i Herzegovina) / Hibrid.info (Kosovo) / Knack Magazine (Belgium) / La Silla Vacía (Colombia) / Lead Stories (USA) / Les Surligneurs (France) / Logically (UK) / Lupa (Brazil) / Maldita.es (Spain) / MediaWise (USA) / Mongolian Fact-checking Center (Mongolia) / MyGoPen (Taiwan) / Myth Detector (Georgia) / NewsMobile (India) / Newschecker (India and South Asia) / Newtral (Spain) / Observador – Fact Check (Portugal) / Open Fact-checking (Italy) / OŠTRO (Slovenia) / Pagella Politica (Italy) Poligrafo (Portugal) / PolitiFact (USA) / Pravda (Poland) / Rappler (Philippines) / Raskrinkavanje (Bosnia i Herzegovina) / Re:Check/Re:Baltica (Latvia) / RMIT ABC Fact Check (Australia) Rumor Scanner (Bangladesh) / Science Feedback (France) / StopFake (Ukraine) / Stopfals.md (Moldova) / Taiwan FactCheck Center (Taiwan) / Tempo (Indonesia) / Teyit (Turkey) / The Healthy Indian Project/THIP Media (India) / The Journal FactCheck (Ireland) / The Logical Indian (India) / The Quint (India) / The Washington Post Fact-checker (USA) / The Whistle (Israel) / Univision – elDetector (USA) / VERA Files (Philippines) / Verificat (Spain) / Vishvas News (India) / Vistinomer (North Macedonia) / VoxCheck (Ukraine) / Youturn.in (India) / 15min (Lithuania)

 

 

 

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар