ВМРО-ДПМНЕ: Кредити за земјоделски инвестиции
Ја продолжуваме политиката на поволно рурално кредитирање со обезбедување на дополнително подобрени услови за кредитите обезбедени преку Земјоделскиот кредитен дисконтен фонд: Кредитите што се достапни преку комерцијалните банки за сите видови инвестиции во примарното земјоделство (купување на земјиште, градби за земјоделска намена, машини и опрема, живи животни и др.) ќе можат да се користат со најниски годишни каматни стапки од 3%, како и за сите видови инвестиции во преработувачката индустрија и трговијата (извоз) со годишни каматни стапки од 4%, што претставува намалени каматни стапки за 1 процентен поен во однос на сегашните. [Рок: 2011-2015]
Образложение:
Каматите на кредитите што се достапни преку комерцијалните банки сеуште изнесуваат 4% за примарното земјоделство и 5% за сите видови инвестиции во преработувачката индустрија и трговијата, што значи дека сеуште нема намалување на каматната стапка кај овие кредити. [Ажурирано на: 19.04.2012]
Заклучно со март 2013 година, каматите на кредитите што се достапни преку комерцијалните банки сеуште не се намалени и изнесуваат 4% за примарното земјоделство и 5% за сите видови инвестиции во преработувачката индустрија и трговијата. [Ажурирано на: 10.04.2013]
Во Отчетот за сработеното на Владата на Република Македонија предводена од ВМРО-ДПМНЕ, 2011-2014, во делот „Земјоделство, шумарство и водостопанство “, поглавјето „ Друга финасиска поддршка на земјоделството“, е наведено:
Преку ЗКДФ во период од 2011 до 2014 година се одобрени 899 барања и вкупно се пласирани 22,5 милиони евра кредити за развој на земјоделството по поволни субвенционирани услови, со што се обезбедени нови 505 вработувања. Годишната каматна стапка е намалена за по еден процентен поен на 3% за инвестиции во примарното земјоделство, и на 4% за сите видови инвестиции во преработувачката индустрија и трговијата. [Ажурирано на: 09.04.2014]
Во јули 2012 година со докапитализација на Македонска банка за поддршка на развојот – МБПР, обезбедени се евтини кредити за малите и средните претпријатија кои откупуваат, преработуваат и извезуваат земјоделски производи. Компаниите можат да аплицираат директно во МБПР, без посредство на деловните банки, а каматата изнесува 3%. Максималниот износ на еден кредит е 300 илјади евра. [Ажурирано на: 09.04.2014]
На 12 јануари 2013 година Владата им овозможи на земјоделските производители поволна кредитна линија преку Македонската банка за поддршка на развојот. Кредитите се со каматна стапка од 3 проценти, а износот на средствата до 300 илјади евра. [Ажурирано на: 09.04.2014]
Имајќи го предвид сето ова може да се каже дека ветувањето : „Кредити за земјоделски инвестиции “, е исполнето.
Линкови:
- Комерцијална Банка: Кредити од средствата на Земјоделскиот кредитен дисконтен фонд (ЗКДФ) – проект за финансиски услуги во земјоделството. [Пристапено на: 19.04.2012]
- Шпаркасе Банка: Земјоделски кредити. [Пристапено на: 19.04.2012]
- НЛБ Тутунска Банка: Кредитна линија преку Земјоделски Кредитен Дисконтен Фонд [Пристапено на: 19.04.2012]
- Отчет 2011-2014: Земјоделство, шумарство и водостопанство [Пристапено на: 09.04.2014]
- МКД (12.01.2013): Кредити за земјоделците со најниска камата досега [Пристапено на: 09.04.2014]
- Вечер (13.07.2012): Кредити со камат од 3 проценти за фирми кои работат со земјоделски производи [Пристапено на: 09.04.2014]
Оценето од: Оливера Војновска
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
